Nota dew taiding, de do ze Grieskirichen sind peschechen von meinen herrn von Osterreich vnd dez hauptmanns LXXXVIII von wegen Hannsen dez Joriger.||
Von erst ist beredt vnd getaidingt, was der Joriger tan hat wider mein herrn von Österreich vnd ir land vnd lewt, darumb so der Joriger für mein herrn herczog Wilhelm an alle gnad kommen vnd was er mit sein leib vnd gut darumb tut, des sol er gehorsam sein.||
Denn vmb daz, so der Joriger wider meinem herrn vnd hawptman tan het, dar [. . .]^a) er das haws Dolet wider gewungen het, [des]^a) hat sich der Joriger dem hauptman an alle gnad dergeben vnd daz er darumb mit sein leib vnd gut tut, dez sol er gehorsam sein vnd sol auch daz haws dem hawptman wider in antworten in all der mas, alz er es gewungen het. Vmb das alles hat der Joriger dem hauptman versprochen mit seinen trewn an eins gesworn aides stat vnd sol im auch der hauptman ein end darvmb geben vor Weinachten schirist.||
Denn vmb des Joriger frewnt vnd knecht, die im vor vnd icz in dem haws Dolet geholffen habent vmb dieselb sach so(l) der hauptman ir gnediger her sein.

Source Fulltext: OÖUB 11 (Wien 1983), S. 763-764