Ich Caspar von Starhenberg vergich für mich vnd für meinen söhn Görgen vnd für all vnser erben, die wir haben oder noch gewinnen^a) offenlich mit dem brieff allen den, die den brief lesent oder hörent lesen, die yezundt lebent oder hernach chunftig werdent, daß wir recht vnd redleich vnd chewfleich ze chawffen haben geben mit gesampt hannt ze der zeit, do wir ez mit^b) recht wol gethun mochten, die vesst ze Degernpach vnd den Obernhof vnd den Nydernhoff vnd das guett auff den Graben dabey vnd die zehent auff dem Obern Hoff vnd auff dem Nidernhoff vnd das dritheil zehent auff dem guett auff dem Graben, das alles lehen ist von dem ehrwürdigen gottshauß ze Mansee, vnd daz landtgericht, daz ze der vorgenante vesst gehort, daz lehen ist von dem edeln wolgebohrnen herrn graven Vlrichen ze Schawnberckh vnd daz gericht ze Grieskirchen in dem marckt, das lehen ist von dem edelen hochgebohrnen fürsten herzog Albrechten ze Österreich, vnd auch den marckt daselbs zu Grieskirchen vnd auch sonst alles daz gut, das ze der vorgenanten vesst gehört, ez sey aigen purckrecht manschafft rittermessigew lehen vnd pawren^c) lehen vogtay wismad hölzer vischwayd wildpann, wie das genant vnd wo das gelegen ist, versuecht vnd vnuersuecht, als wir das in nuz vnd gewehr herbracht haben, vnserm lieben ochaim vnd Schwager Andren von Polhaimb vnd Barbara Pernharz dochter von Hawspach sein hausfrauen vnd allen iren erben, die sie habent oder gewunnent. Wir haben in auch die vorgenante vesst mit sambt allem dem gut, daz vor an dem brieff verschriben stet, ingeantwort aws vnser nuz vnd gewer in ir nuz vnd gewer mit lehen herren handen vnd mit aller stät vnd si darzu bedurffen vnd sullen vnd mugen auch die obgenanten vesst mit aller dew vnd darzu gehört, alz an dem brief verschriben stet, in haben nuzen vnd nyessen vnd allen iren frum damit schaffen mit versezen mit verkauffen vnd damit handlen, wie seu aller pests verlust vnd gut zympt, in gleicher weis recht als wir selber. Wir sein auch der obgenanten vesst mit aller dew vnd darzue gehört, alz vor an dem brieff verschriben stet, ir recht gewehrn vnd furstandt dez lehen, also lehensrecht ist, dez^d) aigen, als aigens recht ist, purckrechtz als purckrechtz recht ist, igleichs in seinen rechten, als dez landes recht ist in Oesterreich vnd ob der Ens. Ging in aber an der gewerschafft icht ab mit dem rechten, waz si dez schaden nämen, darumb in ains pey sein trewen vngeschworn vnd an aller ander bewörung gesprechen mag, denselben schaden sullen wir in ablegen vnd widerchern vnd ausrichten vnd daz sullen sew dacz vns vnverschaidenleich vnd daz unser trewn vnd darzu auff aller vnser hab, wo wir die haben versuecht und vnuersuecht nichtz ausgenomen, wir sein lebentig oder tod, vnd dez schadens dauon bechomen mit vnserm gutleichen willen vnd wort. Auch nym ich obgenand Caspar von Starhenberkch alles das guet auz, das ich hab in Veldner^e) gericht vnd daz lehen ist von dem bistumb ze Pazzaw, das hab ich dem vorgenanten Andren von Polhamb vnd sein erben nicht ze kauffen geben. Vnd der sach zu einem wahren urkundt^f) vnd gueter gedachtnuzz geben wir in vnd allen iren erben für vns vnd vnser erben den brief versigelten mit meines obgenanten Caspars von Starhenberkch angehangem insigil, darunder ich mich obgenant Georg von Starhenberkch sein sun verpint, alles daz stöt ze haben, daz vor an dem brieff verschriben stet, vnd zu pesster sicherhait vnd gezeugnus versigelt mit meines lieben brueder Gundackers von Starhenberckch angehangen insigil vnd mit der edlen herrn herrn Reinprechten von Walsee die zeit haubtman ob der Enss vnd herrn Eberharten von Capellen vnd herrn Gundackers von Tannberkch, allen dreyen angehangen insigeln, denselben drein vnd allen iren erben an allen schaden. Der brief ist geben nach Christi gebuerdt dreyzehenhundert jahr vnd darnach in dem achtvndneunzigisten jahr am Freytag vor dem Prechentag.

Source Fulltext: OÖUB 11 (Wien 1983), S. 667-669