Wir Wilhelm vnd Albrecht vettern von Gotes gnaden herczogen ze Österreich etc. bekennen vnd tun kund offenlich mit dem brief für vns vnd vnser erben, daz wir vnserm getrewn lieben Kadolten von Zelkingen vnd seinen erben schuldig sein vnd gelten sullen zwaitausent vnd fünfhundert phunt Wienner phenning, die sy vns zu vnsern merklichen notdürfften nach vnser vleissigen bete berait gelihen habent vnd dafür wir in aus vnser nuczen, die wir haben von vnser vest vnd herschaft zu Werfenstain, zu rechtem phand versaczt haben vnd verseczen in auch wissentlich mit kraft dicz briefs drewhundert phunt Wienner phenning jeriklicher gult, der in zwaihundert vnd fünfczig phunt gepürent zu dienst von dem obgenanten gelt vnd die andern fünfczig phunt, die wir in von gnaden haben geschafft, in solcher masse, daz wir in dieselben drewhundert phunt phenning von den nuczen vnser egenanten vest vnd herschaft ze Werfenstain jericlich raichen vnd geben sullen vnuerczogenlich zu den vir quatembern im jar, daz wird zu ainer yeclichen quatember fünf vnd sibenczig phunt phenning, als lang vncz daz wir vnser erben oder nachkomen sy der obgenannten zwaitausent vnd fünfhundert phunt Wienner phenning genczlich richten vnd wern. Wenn wir jn die auch also gericht vnd beczalt haben, so sullen vns dieselben drewhundert phunt Wienner phenning jericlicher gult von in genczlich wider ledig vnd los sein ane meniclichs irrung. Ob auch geschech, daz denselben Kadolten von Zelkingen oder sein erben solich not angieng, daz sy die vorgenanten drewhundert phunt phenning iericlicher gult verrer verseczen wolten oder musten, so mügen sy die vmb die obgenanten zwaitausent vnd fünfhundert phunt phenning vnd in der weis, als vor geschriben stet, für basser verseczen ainem der vnsern getrewn vnd gehorsamen. Darumb emphelhen wir vnsern getrewn vnserm gegenwürtigen burggrauen vnd amptman zu Werfenstain oder wer ye künfticlich vnser burggraf vnd amptman da wirdt vnd wellen gar ernstlich, daz sy von den nuczen derselben vnser vest vnd herschaft, die sy von vnsern wegen ynnement, den obgenanten Kadolten von Zelkingen vnd sein erben oder den, dem sy dieselbe gult verrer versaczten, der egenanten drewhundert phunt phenning alle jar also fürderlich vnd an alles vercziehen ausrichten vnd beczalen zu den tegen, als vor benant ist, vnd des mit nichte lassen, wan was sy jn der ye also richtent vnd beczalent, der sagen wir sy genczlich ledig vnd los vnd wellen in die auch an irr raittung ye legen vnd abcziehen, doch als lang, vncz daz wir vnser erben oder nachkomen sy der obgenanten zwaitausent vnd fünfhundert phunt Wienner phenning genczlich richten vnd beczalen, als vor benent ist. Vnd des ze vrkund etc. Datum etc. Lxxxxvm°.

Source Fulltext: OÖUB 11 (Wien 1983), S. 764-765