Ich Hanns der Jörger hern Helmharcz dez Jörger seligen sun vergich vnd tun kunt mit dem brieff, vmb alle die hendel, die ich wider den edeln herren hern Reinprecht von Wallsse die zeit haubtman ob der Enns vnd auch wider lannd vnd lewtt getan habe vnd darumb ich hinder den engenanten meinn heren den hauptman gegangen pin ane alle genade, dem ich darumb gelope vnd versprochen habe vnd lobe vnd versprich auch mit dem brieff an ains gesworn aydes stat, waz der egenante mein herre der hauptman darumb auspricht, daz ich daz alles vollfüren vnd stet halten wil, trewleich ane alles geuer. Dez ze vrchundt gib ich obgenanter Hans Joriger dem egenanten meinen herren hern Reinprechten von Wallsse den brieff mit meinem aygen anhangenden insigel. Darczu so hab ich gepeten mein lieben frewndt Hansen den Joriger awzz dem gepirig vnd Wolfhart den Espen, daz die baide irew insigel zu mein insigel gehangen habend an den brieff zu ainer gezewgnuss vnd gedächtnuzz der vorgeschrieben sach in vnd iren erben ane schaden. Der brieff ist geben dez Mitichen vor sand Themanstag dez heiligen zweliffbotten, do man zalt von Christi gepurt drewczehen hundert iare vnd in dem acht vnd newntzigisten jare.

Source Fulltext: OÖUB 11 (Wien 1983), S. 760-761