Wuer Albrecht von Gottes genaden herzog zu Osterreich zu Steyr zu Khärndten vnd Crain, graff zu Tyroll, bekhennen vnnd thuen kundt offentlich mit dem brieff, das für vnß khommen vnsere gethreuen die eisenheuer zu Hallstatt vnd zaigten vnnß ainen brieff, den ihnen weillandt der hochgebohrne fürsst herzog Albrecht von Österreich vnser ähne löblicher gedächtnus gegeben hat vnd die sechzehn eisen birg, die weillandt die durchleichtige fuerstinn frau Elisabeth Römische Khönigin, der Gott gnädig seye, von wiltem gebürg vnnd gruenen wasen daselbst zu Hallstatt gebauet vnd gestufftet hat, vnd bätten vnnß diemiettigelich, ihnnen denselben brieff von neuen dingen zuuerneuern vnd zu bestättigen, in aller der maß, als der vor von wort zu wort hernach geschriben stehet:||
Nun haben wir genedigist betrachtet vnnd anngesehen der ehegenanten eisenheuer fleissige bitt vnnd auch die dienst, die sie weillandt vnsern vordern seeligen vnd vnß stettigelich gethann habendt vnd hernach hinfuehro thuen sollen, vnnd haben inen vnd allen ihren nachkhomben dadurch vnd von sundern genaden den obgenanten vnsers anen brief mit allen puncten vnnd articuln, die darinen von Wort zu Wort seindt begriffen, von neuen dingen bestettet vnnd bekröfftiget, verneuern vnd bestetten in auch den wissentleich mit disem brieff füer vnnß vnnd vnnser erben vnd mainen vnd wollen, das der nun fuerbaß allweg bey seinen cröfften bleibe vnnd war vnd stath gehalten werde ohne menigeliches ierrung vnd widerredt.||
Dauon gebieten wier festiglich vnsern lieben gethreuen allen vnsern haubtleuthen herrn rittern vnd knechten pflegern burggrauen richtern mauttnern vnd allen anndern vnnsern ambtleithen vndterthanen vnd gethreuen, dennen diser brieff gezaigt wurdt, vnnd wollen ernstlich, das sie die ehegenanthen eißen heuer bey dem obigen brieff vnnd dennen berglehen ganzlich lassen bleiben vnnd darwider nicht thuen noch schafftig gethann werde in khain weiß, wann wir das ernstlich mainen, mit vhrkundt dises brieffs. Geben zu Wienn am Mittwochen vor Gottes Leichnambstag nach Christi geburth dreyzehenhundert jahr, darnach in dem neunvndneunzigisten Jahr.||
Dominus dux in consilio.

Source Fulltext: OÖUB 11 (Wien 1983), S. 822-823