\Sigismundus/ Tertius Dei gratia rex Poloniae, magnus dux Lithuanie, Russiae, Prussiae, Masoviae, Samogitiae Livoniaequae etc. nec non Regni Suaetiae proximus haeres et futurus rex, significamus presentibus literis nostris, quorum interest, universis et singulis, eam nobis de innata nostra erga subdito nostros benignitate non postremam incumbere curam, ut civitates regni nostri in optimo ac florenti statu teneamus et in ordine convenienti totius universi pulcherrimo perpetuo conservemus. Quod ita demum recte fieri solet, cum ea in illis norma magistratus et ratio publicae rei administrandam instituitur, quaecum in aliis plerisque regni nostri primariis civitatibus, usu antiquissmo recepta, tum ad communem iusticiam propagandam, ac faelicem et tranquillum earundem civitatum statum retinentur, convenientissima esse dignoscitur. Cum itaque nobis pro parte spectabilum et famatorum proconsulis, consulum ac totius communitatis civitatis nostrae Lublinensis supplicatum esset, ut illis advitalitatem offitiorum, quibus hactenus in ordine consulari fungibantur tanquam optima ratione introductam antiquissimo usu in ea civitate receptam ac illis per manus traditam et gratia et benignitate nostra regia approbare, confirmare et in usu ac possesionem eorum perpetua relinquere eosdem dignaremur. Nos, quibus id vel maxime cordi est, ut ea civitas, quae inter alias primarias nostri civitates et emporio celebris et nobilitatis ob iudicia tribunalis, regni stato anni tempore, in ea celebrari solita conventu frequens et earum rerum, quae ad communes vitae necessitates quaeruntur, copia abundans, habetur, optimis institutis pacis ac iusticiae ornamentis sub faelici nostri regiminis imperio floreat, quam id etiam ad recte constituendas illius rei publice rationes pertinere intelligamus eam advitalitatem magistratus, quae ab ipso temporis tractu ac diuturnitate optimis nititur fundamentis. Auctoritate nostra regia illis approbantes, confirmantes et ratificantes esse duximus uti, quidam approbamus, confirmamus et ratificamus praesentibus literis nostris decernentes tam magistratum modernum ac personas in offitio consulari existentes, quam quae post harum decursum ad munus consulare obeundum per eos, qui ad electionem pertinent, iuxta consuetudinem illius loci dilligentur, advitali perpetua ofitiorum suorum functione frui et gaudere debere perpetuo et in aevum. Quod ad noticiam omnium, quorum interest, praesertim viro capitanei nostri Lublinensi moderni ac pro tempore existento, ac communitatis eiusdem civitatis deducentur mandamus, ut praenominatos praeconsulem et consules civitatis nostrae Lublinensis, modernos et pro tempore existentes, in ea praerogativa advitalitatis offitiorum suorum a nobis illis gratiose concessa firmiter ac inviolabiliter conservent, manuteneant et ab aliis conservari, manuteneri omnino curent pro gratia nostra. In cuius rei fidem praesentes manu nostra subscripsimus sigilloque regni nostri communiri mandavimus. Datum Vislicae, die vigesimaquarta mensis novembris, anno Domini millesimo quingentesimo nonagesimo primo, regni nostri anno QUARTO. Sigismundus rex.

Source Fulltext: Lublin w dokumencie / http://teatrnn.pl/lublinwdokumencie