Nos Elizabeth Dei gracia regina senior Ungarie et Polonie, notum facimus, quibus expedit universis, quod nos considerando et summopere animadvertendo, quomodo nostri fideles .. cives et incole civitatis nostre Lublinensis in metis et finibus infidelium Lythvanorum constituti, plurimum indigeant auxiliis et subsidiis, volentes ipsos, ut ad queque fidelitatis insignia reddantur proniores, gracia consequi speciali, exnunc ipsos et quoslibet dicte nostre civitatis Lublin .. incolas circa omnes et singulas libertates, consuetudines atque iura, quibus temporibus illustrimorum nostrorum predecessorum duorum Wladislai genitoris et Kazimiris fratris, regum quondam Polonie, nostrorum carissimorum usi sunt atque freti et prout in literis ac privilegiis, quas et que habere dinoscuntur eorundem nostrorum predecessorum plenius continentur, volumus ac promittimus presentibus nostris literis conservare, mandantes vobis, nostro fideli domino .. capitaneo Lublinense, qui nunc estis aut fueritis pro tempore, quatenus supradictas nostrorum predecesorum libertates et consuetudines nullatenus eisdem nostris civibus infringere debeatis, sicuti indignacionem nostram gravissimam volueritis evitare, dimittendo ipsos signanter circa advocaciam terrestrem, si et quantum ipsam tempore domini Kazimiri regis quondam Polonie, fratris nostri et usque ad exitum ipsius de carne habuerunt et universaliter circa omnia et singula iura, consuetudines atque modos, que et quas, vobis capitaneatum acceptante, dinoscuntur habuisse, aliter non facturi. Harum quibus sigillum nostrum appensum est testimonio literarum. Datum et actum Cracovie, in crastino Epiphanie Domini, anno eiusdem millesimo trecentesimo [septuagesimo septimo.]

Source Fulltext: Lublin w dokumencie / http://teatrnn.pl/lublinwdokumencie