Nos consules novi et antiqui civitatis Lublinensis una cum omnibus et singulis czechemagistris omni et singulorum artificum mechanicorum et tota communitate civitatis Lublinensis, publice recognoscimus per presentes omnibus et singulis presentibus et futuris presencium noticiam habituris et convenimus famatum Johannem magistrum canalium una cum Luca Czyrista consocio suo de Nova Sandecz ad facienda et ad eugenda canalia nostre civitati Lublinensi, tali condicione, posicione et ordine: in primis supradiciti magistri debent facere obstacula alias zayatza in fluvio Bystrzycza et civitas tenebitur dare robora et rubeta ac terram, a quo obstaculo incipendo civitas debet fodere fossatum et alweum propriis impensis alias drabarta, quo alveo decursus et meatus aque in posticum ortus notarii civitatis ducetur. Ex quo loco adduccionis aque ipsi magistri canalium propriis impensis aquam in altum ducere debent et civitas omnia robora pro ipsis canalibus congrua et spectancia dare tenebitur. Ipsi vero magistri, quantum de cupro et ferro necessarium fuerit, providere et dare tenebuntur, quam aquam in civitatem ducere debent et ipsi cives fossatam canalibus usque in civitatem fodere tenebuntur cumque divino auxilio aqua adducta fuerit. Extunc in primis et ante omnia in duabus cistis aquam in medio civitatis dare debent et tandem ad braxatoria aquam debent ducere et civitas robora dare tenebitur. Cumque ipsi magistri aquam ad braxatoria adduxerint extunc ipsi magistri a qualibet braxatura cervisie, ad spacium sex annorum, sex grossos comunis in regno currentis pecunie, numeri polonicalis consueti debent habere et recipere, ex quibus sex grossis ductori braseorum in molendinum. A quolibet braseo in molendinum adducto et vice versa reducto, unus grosus assignetur et detur, et si solimet magistri canalium ducere brasea poterint eodem grosso gaudere debent. Item a quolibet medone ipsi magistri ad spacium sex annorum per unum grossum recipient, lapsis vero sex annis, dictus grossus civitati ex integro perpetuo cedet et dum sex anni expirabunt et lapsi fue[r]unt extunc a qualibet braxatura cervisie ab eo, qui braxaverit quatuor grossi civitati et duo grossi ipsis magistris et ipsorum legittimis successoribus perpetuo dentur et solventur, ex quibus quatuor grossis civitas debet providere, ut brasea in molendinum ducantur et vice versa reducantur. Ut si et in quantum iam dicti magistri canalium ad hoc sufficere possent ad ducendum brasea in molendinum extunc grosso superius expresso debent contentari et gaudere. Et infra hos sex annos si quid in dictis canalibus destructum fuerit, ipsi magistri propriis impensis reformare tenebuntur. Post decursum vero sex annorum, si quid in dictis canalibus destructum fuerit extunc ipsi magistri reformare tenebuntur, nichilominus ipsa civitas robora, cuprum alias myedz et ferrum dare tenebuntur et pixidario ac fabro a labore solvere, ad quam reformacionem tenens, quotiens acciderit perpetuo reformare tenebuntur. Item dum et quando fluvius, quo aqua ad canalia ducitur destrueretur extunc civitas quolibet anno perpetuis temporibus drabartam facere debent et alweum ac flumen purgare. Item in eodem loco, ubi aqua in altum recipietur, ibi debemus sibi, magistro Johanni, ipsius consocio ortum et locum ad edificandum stubam una cum roboribus extradere et dare iure hereditario, a quo quidquid orto et domo in ibi circa canalia constructa nullus census civitati solvi debet, sed dicti magistri canalium in eodem loco convenientes debent perpetua libertate frui, sunt quia perpetuo liberi et exempti ab omnibus exaccionibus, contribucionibus et quibus aliis oneribus civitatis. Qui quidem magistri canalium et eorumdemc successores debent providere et aspicere diligenter, ut aqua sit sufficiens et omnia necessaria ad id pertinencia, ex eisdem duobus grossis. Item si et in quantum dicti magistri aliquam utilitatem aliam in eodem alveo et fluvio excogitare possent, dempta hac rotha, qua pellitur sursim aqua extunc duas partes civitas et terciam partem ipsi magistri pro edificiis impendant et simili modo civitas duas partes utilitatis et terciam partem ipsi magistri et eorum successores habebunt. Item si et in quantum sufficiencia aque fuerit et aliqui civium canalia in ipsorum domibus habere voluerint, extunc a performacione unius roboris unum grossum et alium grossum magistro canalium solvere debet. Eciam dum et quando dicti magistri aut eorum legittimi successores eadem canalia vendere voluerint, extunc de consensu dominorum consulum magistro bene perito et sufficienti, qui eis placuerit vendere potuerint et ad eorum usu beneplacitum convertere prout ipsis melius et utilius expedire videbitur. Et in fidem et testimonium ac robur, perpetue firmitatis sigillum nostrum presentibus est subappensum. Actum et datum in Lublin, in prethorio nostro Lublinensi, \fe/ sexta proxima ante festum sancti Valentini, anno Domini millesimo quingentesimo sexto.

Source Fulltext: Lublin w dokumencie / http://teatrnn.pl/lublinwdokumencie