Sigismundus Dei gracia rex Polonie, magnus dux Lituanie, Russie Prussieque dominus et heres etc., universis et singulis palatinis, castellanis, capitaneis, tenutariis, burgrabiis, preconsulibus, consulibus civitatum et oppidorum, theloneatoribus, theloneroum pontonum et quorumvis introituum custodibus exartoribusque et presertim Cracovie, Buczne, Poznanie, Lancicie, in Radom, Rawa, Cleczow, Radomskye, Sandomirie, Crasnistaw, Belz, Sokale et Chelm, ceterisque presentibus requirendis sincere et fidelibus dilectis, graciam nostram. Magnifici, generosi nobiles/ famosi et providi sincere et fideles dilecti famosi preconsul et consules civitatis nostre Lublinensis produxerunt originaliter coram nobis privilegia duorum predecessorum nostrorum, quibus ab omnibus theloneis in regno nostro solvendis sunt exempti et liberati. De quibusquidem, visis privilegiis, testimonium perhibemus vobis mandantes, quatenus cives ipsos et incolas civitatis Lublinensis in his ipsis libertatibus omnimode conservetis, nulla thelonea ab eis per regnum nostrum cum mercibus eorum cunctibus in locis solitis exigentes, exigique permittentes pro gracia nostra aliter non facturi. Datum in ipsa civitatis [Lu]blin, feria quarta proxima post festum sancte Zophie, anno Domini millesimo quingentesimo octavo, regni nostri anno secundo. Relatio venerabilis Joannis de Lassko Regni Polonie cancellarii. (Locus sigilli)

Source Fulltext: Lublin w dokumencie / http://teatrnn.pl/lublinwdokumencie