SIGISMUNDUS Dei gratia rex Polonie, magnus dux Lithuanie, Russie, Prussie etc. dominus et heres, significamus tenore presentium universis, quia nos volentes augere communes utilitates et proventus civitatis nostre Lublinensis, quo facilius reparar[i] possit et contra Thartarorum aliorumque hostium nostrorum impetum fortius muniri, dedimus et concessimus facultatem damusque et concedimus proconsuli et conusu[l]ibus eiusdem civitatis nostre Lublinensis presentibus et futuris, quod possint uni, duobus vel pluribus civibus suis vel etiam externis et alienis secundum eorum voluntatem et beneplacitum permittere, pro annuo censu distillare vinum sublimatum, illudque publice vendere et propinare et alios incolas eiusdem civitatis, cuiuscumque condicionis vel ritus existant a vendicione et distillatione illius tam intra, quam extra civitatem modo convenienti et licito prohibere, consuetudine antiqua in eadem civitate diu observata, non obstante cui, ad istam vini sublimati distillationem et vendicionem derogamus per presentes in perpetuum. Proconsul tamen et consules predicti censum ex huiusmodi vino provenientem pro reparatione civitatis aut ad alias eius necessitates convertere debebunt et tenebuntur. Harum testimonio literarum quibus sigillum nostrum est appensum. Datum Cracovie, feria quinta proxima post festum natalis sancti Stanislai episcopi et martiris, gloriosi patroni nostri, in maio anno Domini millesimo quingentesimo vigesimo quarto, regni vero nostri anno decimo octavo. Relatio reverendi in Christo patris domini Petri de Thomnic Cracoviensis et Posnaniensis episcopi et Regni Polonie vicecancelarii.

Source Fulltext: Lublin w dokumencie / http://teatrnn.pl/lublinwdokumencie