||[10] Onzüchtiger redena

○+Ittemmb an unnser liebenn frowenn tag vor Wiennacht im thusig vier hunndert nüntzig und vier jar ist besetzt unnd uffgnomenn vor ainem aman unnd grossem zwenn fachnen rad. Welcher zum annder fraifenlich unnder die ougenn in hoͤner wiß rett: «Du muͦst mirs erhytt han.» Older das ainer jaich: «Ich welt ee, dz dich das fallennd uͤbel angienng.» Ald dz ainer zum anderen jaich: «Welcher das rett, der luͤgtt», unnd diser rett: «Ich rettz older jechß», unnd diser aber rett: «Welcher dz redt, der luͤgtt», older ainer dem ander denn rittenn wunste unnder die ogen, das dero jegklichs vor frid, wann es fraͤffenlich in honer wist geschichtt, zuͦ buͦß verfallenn sin sol zechen schilling pfennig. Obs aber hertter wurd, dz sy zuktenn older ain anderen schlachenn wurdenn, das solliche wortt der buͦß ain anfang sin sollind. Welcher och dem anderen soͤliche wort zuͦretty über frid, das der selbig die zechen pfund pfennig zuͦ buͦß verfallen sin sol, wie dz hienach an disem buͦch1 geschribenn stadtt.2