154.

Kerstiaen Waeye ende Robrecht de Brune, manne van leene ons gheduchts

neeren shertoghèn van Bourgongne, grave van Vlaendren, ende onser gheduchter vrauwen van Bourgoinge, arvachtighe graefnede van Vlaendren, doen te weteue allen lieden, dat camen voor ons mannen boven ghenoomt in propren personen der Jan Verghetoot, spycwaerder vanden clooster van sinte Bertins ende procureur in dit stick over tvoorseider clooster of een zide, Willem van Dudsele, Jan Maerc, Wouter de Gloyere, Wouter Bollin, Andries de Moenc, Jan Roelvoet, Daniel f. Jacobs Weyts, Clais f. Jans Haveloos, Gillis f. Jans Neezen, Jan f.

201

Willems f. Willems ende Andries f. Jans vanden Walle, alle wonachtich binden ambachte van Lisseweghe, over hemlieden ende over alle de ghone diere in vervanghen willen wesen of anderzide, kennende ende lyende an beeden ziden, dat van allen ghescille, processe of ghedinghe, die zy onderlinghe ghehadt moghen hebben toten daghe van heden, als van zekeren hecssche van vlastienden, die der Jan Verghetoot voorseid in den name vanden voorseiden cloostre heesschende was binden ambachte van Lisseweghe voorseid, ende ooc de achterstellen van dien van vele jaren, dat zys daer of gheheel ende al bleven zyn, int segghen wysdom ende ordonnance van Sanders Spiering, bailliu van Brucghe, ende van Pieter Leyns, belovende partien in beeden ziden tsegghen van hemlieden wel te hondene ende te vulcommene zonder daer ieghen te gane noch te doene in enigher manieren, de welke zegghers aldaer present ende voor oghen waren als hemlieden ghelast kennende metter zegghene voorseid, worden aldaer zegghende over haer wysdom ende ordonnance tusschen den voorseiden partien, als daer voor oghen zynde, bi ghoeder voorsie- nichede ende deliberatien als wel gheinformeert van partien in beeden ziden tghoend dat hier naervolcht. Eerst dat de voornoomde personen vanden ambachte van Lisseweghe voorseid ende alle dandre diere in vervanghen willen wesen, zo voorseid es, quite zullen bliven ende onghehouden van alle achterstellen van verledenen jaren toten daghe van heden vander voorseide vlastiende van Lisseweghe- ambacht. Item dat die van Lisseweghe voorseid zullen zyn quite ende onghehouden van allen costen van brieven van ghedinghe ende processe ende andre costen die de voorseide her Jan Verghetoot ghedaen heift int vervolch vander vlastienden voorseid. Item dat die van Lissewegheambacht voorseid voord an ten euweliken daghen zullen bliven gheldende jaerlix den voorseiden clooster van Sinte Bertins in de vlastiende voorseid, van elker roede vlas, ene vlaemsche mite alomme binden voorseiden ambachte, ende hierof zal den eersteu oust zyn int jaer van neghene ende neghentich naestcommende, ende also achtervolghende van jare te jare ten euweliken daghen, ende hiermede ghepait te zine an beeden ziden; ende al tghoend, dat voorseid es, kenden de voorseide segghers gheseit hebbende over haer wysdom ende ordonnance tusschen den voorseiden partien, baden ons mannen voornoemd kennesse derof up hemlieden te draghene; ende hierof zyn twee brieven al eens inhoudende van worde te woorde, den enen omme den voorseiden clooster van Sinte Bertins ende den andren omme die vanden ambachte van Lisseweghe voorseid. Ende omme dat wy mannen voorseid hier- over stonden ende gheroupen waren als mannen, so hebben wy ten versouke van partien in kennessen der waerheit dese letteren huuthanghende ghezeghelt met onsen zeghelen. Dit was ghedaen int jaer ons Heeren MCCC achte ende neghentich, up den zevene ende twintichsten dach in October.

Original. Sceaux enlevés.

202