122.

Nous Guis, cuens de Flandres et marchis de Namur, faisons savoir a tous, 'ke nous les lettres de nostre chier et foiable Sohier de Baillueil, chevalier,

Ш

avons veues saines et entieres sans vice et sans rasure, saielees de son saiel et des saiiels de nos houmes, en le fourme ki ci apries sensuit.

Nous Sohiers de Bailluel, chevaliers, marischaus de Flandres, faisons savoir a tous ceaus ki ces presentes lettres verront et orront, ke mesire Watiers de Cokelers, chevaliers, vint pardevant nous, ki teniemes et tenons le liu nostre tres chier et noble seigneur Guion, conte de Flandres et marchis de Namur, et pardevant les houmes mon seigneur devantdit, cest asavoir mon seigneur Henri de Morselede, chevalier, adonc bailliu de Cassiel, Jehan Lauwart, adonu bailliu de Berghes, Joffroit de Rensieres, Pieron de Lo, Jehan Bardonc, bour- gois dYppre, et Jehan le Put, et amena li devantdis mesire Watiers pardevant nous et les houmes devantdis Daniel, son ainsneit fil et son hoir, a otroiier toutes les ventes et les wers, ke li dis mesire Watiers avoit jadis fais des dimes, kil avoit vendues al eglise de saint Biertin, einsi comme il le devoit faire et lavoit proumis, selonc ce kil est contenu es chartres, ki furent faites sour les ventes et les wers devantdis; si coume lidis mesire Watiers reconnut pardevant nous et les houmes. Et nous, ki sour ce eumes plain pooir, en liu de mon seigneur le conte, si coume li houme devantnoumei le tiesmoignerent et jugierent, mesimes en noliu tant coume a ceste besougne, Eustasse Hauwel, adonc bailliu dYppre, et jugierent lidit houme, kil iestoit mis souffisamment; adonc li devantdis Daniaus, fils mon seigneur Watiers devantdit, par le juge ment des houmes devant noumeis, mist sen otroi et sen assent boenement a toutes les ventes et les wers devantdis, et quita en le main deldit bailliu aoes Iedite eglise, tout quan kil avoit et peuist jamais avoir de droit en toutes les dimes devantdites, coume hoirs a mon seigneur Watier devantdit, et ce fait li devantdit houme jugierent aloy, ke li devantdis Daniaus en avoit tant fait parmi les choses devantdites, kil navoit riens es devant dites dimes, ne poroit jamais avoir, se ne fust de nouviel aqueste; et nous Henris de Morselede, che valiers, Jehan Lawars, Joflrois de Rensieres, Pieres de Lo, Jehans Bardonc, bour- gois dYppre, et Jehans le Put, houme mon seigneur le conte devantnoume, reconnoissons et tiesmoignons, ke toutes les choses devantdites sunt faites bien et a loy pardevant nous et par no jugement, si coume il est devant dit; en tiesmoignage de laquel chose, nous Sohiers de Bailluel devantdis, nous Eustas- ses Hauwiaus, baillius dYppre, et nous houme le conte devantnoumei, avons mis nos saiaus a ces presentes lettres. Ce fu fait en lan del Incarnation nostre Seigneur mil deus cens quatre vins et ciunc, el mois davril, le diemence en le quinzaine de pasques, en le vile dYppre. Et nous Guis, cuens de Flandres et marchis de Namur devantnoumeis, toutes les choses einsi coume eles sunt ci desus escrite et devisees, loons, greons, aprouvons et confremons, et les ferons tenir fermes, coume sires de le tiere. En tiesmoignage de laquel chose

18

138

nous avons fait metre nostre saiel a ces presentes lettres, ki furent faites et donnees en lan de grace mil deus cens quatre vins et ciunc, el mois de novembre.

Original. Sceau enlevé.