Ich Lewtolt von Chunrring, schenkch in O^esterreich, vergich an disem brief und tuen chunt allen den die in sehent oder hoernt lesen, den gegenwürtigen und den chuemftigen, daz ich dem ersamen meinem lieben gevattern probst Ekcharten von Sand Poelten und seinem gotzhaus datz Sand Poelten durich got und durich di grozzen freuntschaft, di wir paid zu einander haben, di fuedrung und auch di gnad han getan, daz ich im erloubt han einen hof ze paun datz Wochaw¹ auf den garten der bei des Grueber haus da leit. Und schol man mier all jar an sand Cholmans tag von dem selben hof datz Wochaw ze voitrecht geben zwen und dreizzig phening der gewondleichen münz. Und schullen si in dem selben^a hof iern frum schaffen mit schenchen oder mit swew^b si mügen oder welnt. Und schol der selb egenant hof datz Wochaw mein und meiner chind ewig und recht erib^c vogtai sein. Und ich und auch mein eriben schullen dehainen umbgelt auf dem selben egesprochen hof datz Wochaw weder mit stewr noch mit nachtseld noch mit dehainen andern dingen haben noch vodern, wann di zwen und dreizzigch phening di êe geöffent sind. Und der selb hof schol alles daz recht von mier und von meinen eriben haben, daz ander ier guet in der Wochaw von uns hat. Und daruber gib ich dem egenanten meinem lieben gevattern probst Ekcharten von Sand Poelten und dem selben seinem gotzhaus datz Sand Poelten^d disen brief mit meinem anhangunden insigel versigelten und vervestent ze ainem warn und sichtigem ürchund und zu zeug diser^e sache. Und sind des gezeug her Hainrich von Swellnpach, her Marichart von Zwetel, her Ruemhart^f von Räna, her Hadmar^g von Spitzz, Arnolt von Prawnstorf, Arnolt und Pilgreim von Dobra, Arnolt von Hugling, Oertwein von Wochaw, Fridreich an dem^h Sant, Ruedel der Grueber, der disen brief schraib, und ander frumer leut genüg. Der brief ist geben datz Tiernstain, nach Christi gepürd uber drewzehen hundert jar darnach in dem achten jar, des sampstags² an sand Veyts tag.

Source Fulltext: LAMPEL, Urkunden Sanct Pölten (=FRA I, Wien 1981) S. 221-222