Ich Stephan von dem Newn wald, hern Otten aidem von Chueffarn, und ich Osann sein hausvrow und unser eriben verjehen und tuen chunt allen den di disen prief ansehent oder hoernt lesen, di nu lebent und her nach chuenftig sind, das wi^er zwai guet haben dacz Eysgestorf ze rechtem pu^erchrecht von dem gotshaus dacz Sand Poelten; das ain dien wier besunderlich unserm herren dem probst, das ander in di chamer. Nu waren diselben guet etleichew jar ungedient beliben; dar umb so war wi^er gen unserm herren probst Phylippen und dem chamrer in unwillen gevallen, und wolten auch recht gen uns gesuecht haben umb ier dienst. Du sandt wier di erbern herren zu in paiden, hern Chunraten^a von Arnstain und hern Otten von Ror; di selben habent uns den unwillen ab geleit und genad erwarben also mit beschaiden red, das wi^er fuerbas immer mer unser recht pu^erchrecht schullen geben an den rechten tagen, als ez gestift ist: des ersten von dem ainn guet unserm herren dem probst schull wier dienen alle jar an sand Poelten tag fumfthalben schilling wienner phenning^b und nicht mer; dar u^eber so schuell wi^er von dem andern dienen in di chamer alle jar an sand Michels tag ein halb phunt phenning^c und an sand Poelten tag ze vogtrecht fuenfzehen phenning und auch an sand Michels tag ein gans, zwai huenr, ze ostern vier chaes und sechzigk aier; und swenn wier das vorgenant dienst nicht geben an den tagen die vor benant sind, so schol uns unser herr der probst mit unserm guetem willen haizzen phenden auf dem selben gut paide fuer dienst und fur das wandel. Ist aber das ich Stephan das phant aus nim^d vierzehen tag und gib in der vrist das dienst, so pin ich und mein eriben des wandels ledig. Ist aber das ich mich phants wer und den poten dar an ierr, so schol ich mit sampt im reiten in di stat hinz Sand Poelten auf meinen schaden in ein gasthaus und schol nimmer wider daraus choemen, ez werd denn unser herr der probst und der chamraer ier dienstes aller ding schon gewert. Ist aber das getan, das ich den poten phants ierr und dar uber nicht in var und auch nicht laist, als vorgeschriben stet, ich oder mein eriben, so schol sich unser her der probst der zwaier guet dacz Eisgestorf underwinden und in sein gewalt und des gotshaews ziehen mit unserm gueten willen und schuel wi^er fuerbas dar zue dhain zueversicht nimmer mer gewinnen. Das disew red also staet und unzebrochen beleib, dar ueber so geb wier ich Stephan von dem Newn wald und ich Osann sein hausvrow und unser eriben unserm herren probst^e Philippen und hern Meinharten von Rewt zu den zeiten chamraer dacz Sand Poelten disen prief versigelt mit der erbern herren insigeln hern Chuenrats von Arnstain² und hern Otten von Ror zu einem offen uerchuend und zu einem waren gezeug diser sachhe, wann wi^er aigens insigels nicht haben.^f Und sind auch der red^g gezeug her Seifrid zu den zeiten techent dacz Sand Poelten, her Hainr. von Wienn guster da selb, her Eberhart^h der pharrer, her Bartholome der Walich, her Hainr.der Piber,ⁱ her Goetfrid von Toczenpach, Symon von Potenprunn, Rueger sein sun, Goetfrid, Fridr. und Hainr. di pruder von Harlant, Reinprecht, Ott und Erchkenger von Mehters und ander piderb leut genueg, den dise sachh wol chunt ist. Dicz ist geschehen und^j der prief gegeben^k dacz Sand Poelten, do von Christi^l gepu^erd waren ergangen drewzehen hundert jar und^m dar nach in dem funfzehenten jar, an sand Goerigen tag.

Source Fulltext: LAMPEL, Urkunden Sanct Pölten (=FRA I, Wien 1981) S. 232-234