Ich Cholhoch von Olarn^a vergich und tuen chunt allen den^b di disen brief an sehent oder lesent^c oder hörnt lesen, die nu lebent oder^d hernach chünftig sind, das ich und mein hausvrow vrow Gedraut und unser eriben versezzen heten den dienst siben jar von ainem guet datz Pheffing‚ das wi^er dienen schulten^e ze recht dem probst und dem gotzhaus datz Sand Pölten. Nu foricht ich meiner sel dar umb und chom zu dem probst und zu der sammung hinz Sand Pölten und pat genaden umb di saumung an^f dem vorgenanten dienst. Do tet mier mein her^g der probst und auch die sammung di genad, das si mier willichleich liezzen allen den dienst der versaumt was also mit beschaidner red, das ich fuerbas immermer^h schol dienen von dem vorgenanten guet dreizzig metzen habern chorn mazz an sand Cholmans tag hinz Sand Pölten; und wenn ich oder mein hausvrow vrow Gedrautⁱ oder unser eriben saumig wolten sein und den dienst nicht dienen wolten z'der zeit als vor geschriben stet, so ist das selb guet ze Phëffing dem probst und dem gotzhaus datz Sand Pölten ledig, das ich^j noch mein haus vrow vrow Gedraut, noch unser eriben dehain ansprach schullen fürbas darauf haben. Und darumb das diese red stet und unzebrochen beleib, gib ich den vorgenanten herren probst Hainreichen und der sammung datz Sand Pölten disen offen brief versigelt mit hern Chuenrats insigel von Rezzing und mit meinem insigel. Diser sache sind auch gezeug di erbern leut^k di hernach geschriben sind, das ist: her Wulfinch von Wald, Eberhart von Chatzenperg, Andre der Moll, Nicla der Moll, Leupolt der Moll und Hainr. der Prunnër, Sighart der Prunner^l und ander piderb leut‚ den di sache chunt und gewizzen ist. Do dise sache gewandelt und geschehen ist, do was ergangen von Christs gepürd dreuzehen hundert jar funfzehen jar, des nachsten suntags vor der epyphania.

Source Fulltext: LAMPEL, Urkunden Sanct Pölten (=FRA I, Wien 1981) S. 231-232