Ich Heinrich Geswenter von Lengenveld vergich und tun chund allen den die disen brieve ansehent oder lesent oder hornt lesen, di nu lebent und hernach chünftig sind, das ich unbedünchlich und mit wolbedachtem muet meinen^a zehent ze Volkendorf, den ich und mein vorderen ze lehen heten von dem brobst und von der samnung wegen des gotzhaus dacz Sand Polten, ze chaufen han geben ledigklich und unzertailt^b meinem herren demselben brobst Heinrichen und der samnung desselben gotshaus umb vierdhalb phund phenning und zwainzigk phund phenning^c wienner müns mit meiner hausfrawen frawn Elspeten und mit aller unser erben guetlichem willen, also das noch ich noch mein hausfraw fraw Elspet noch dhain unser erben süllen furbas ansprach darauf haben. Und darumb das die vorgenanten herrn und ir gotshaus von mir und von meiner hausfrawn frawen Elspeten und von allen unsern erben beleiben umb den vorgenanten zehent unbeswärt ewigklich; und auch das die wandlung stët und unzebrochen beleib, gib^d ich den oftgenanten herrn disen offen brieve versigilt mit der erbern herrn insigilen hern Wulfings von Wald und hern Ru^edolfs des Wiersings, wann ich aigens insigels nicht enhan. Diser sach sind auch gezeugen die erbern leut die hernach geschriben sind, das ist: Seyfrid Gswenter und Heinrich Geswenter und Abel Gswenter und sein bruder Dietreich und Diethreich Gswenter von Hungerperg, Seyfrid Sicherpech und sein sun Seyfrid und seins brueder sun Fridreich und Ulrich Uetze und Chonrad Newndorfer und ander biderbleut genüge, den die sache chund und gewissen ist. Die wandlung ist geschehen, do von Christi^e gepurde ergangen waren dreuzehenhundert jar darnach in dem sechzehenten jar, an sand Valentinstag.

Source Fulltext: LAMPEL, Urkunden Sanct Pölten (=FRA I, Wien 1981) S. 237-238