Wi^er Ott der Wuelfelstorffaer^a zu den Zeiten purgermaister und der rat von der stat ze Wienn verjehen und tuen chunt allen den di disen prief sehent oder hoernt lesen, die nu lebent und hernach chuemftig sind, das der erbaer man her Dietr. der Chlewer^b purger ze Wienn nach seiner erern haeusvrown tod vron Hailken sein haus, das da leit pei der Himelporten gegen des erbaern hern hous des abts von Choetweig u^eber, mit guetem willen und gunst seiner chind, di er pei seiner vorgenanten hausvrown gehabt hat, Dietreichs, Niclas, Leutweins seiner suen und seiner toechter vrown Gedrawten und vrown Margreten und ir wiert Elbleins des Goltstains und Julians hern Ortolfs des stat schreibaer suen‚ dem got genad, seiner paider aidem, di sich alle vor uns in dem rat des vorgenanten hauses willichleichen fuerzicht habent getan, hat verchouft umb hundert und umb sechs und dreissigk markch silbers wiennaer gewichtes, immer zwen und sibenzigk grozzer pehemischer phenning fuer ein igleich markch, der er recht und redleichen gewert ist, dem erbaern herren probst Hainr. und dem chloster von Sand Poelten fuerbas vreileichen und ledichleichen ze haben und allen iern frumen da mit ze schaffen mit verchoufen, mit verseczen und geben swem si wellen an allen ierrsal und an alle ansprach, als ez in allen pest choem und fueg. Das diser chouf fuerbas staet sei und unzebrochen ewigklich^c beleib, des geben wi^er den^d egenanten herren probst Hainreichen und dem chloster ze Sand Poelten den^e prief ze einem sichtigen uerchuend und zu einem waren gezeug und zu einer ewigen vestnung diser sach versigelten mit unser stat insigel. Diser prief ist gegeben ze Wienn, do von Christi gepu^erd ergangen waren dreuzehen hundert jar in dem neunzehenten jar, an dem sunnbent tag.

Source Fulltext: LAMPEL, Urkunden Sanct Pölten (=FRA I, Wien 1981) S. 245-246