Ich Alber von Mainberch und min hausvrowe Margaret wir verjehen und tun chunt allen den di disen brief sehent, lesent oder hornt lesen, di nu lebent und hernach chunftig sind, das wir mit verdachtem muett haben gesaczt unsers rechten aigens Ulreichen von Antheis und siner hausvrowen vrovn Kathrin ain guet, das man nent an dem Notlis,¹ mit alle dew und darzu gehört, umb an drei schilling für sibenzehen phunt phenning wienner munz, also beschaidenlich, das alle jar lasung sol sein z'den weinnachten und allen irn frum damit schaffen, mit verchaufen, verseczen und allen iren frum schaffen umb dieselben phenning an allen irsall. Und secz ich mich auch ich vorgenanter Alber von Mainberch dem egenanten Ulreichen und seiner hausvrown vrown Kathrin und iren erben des vorgenanten gutz ze scherm und geweren für alle ansprach, als saczung recht und des landes gewonhait ist in Osterreich. Das die red stet und unzebrochen beleib‚ darüber gib ich vorgenanter Alber von Mainberch dem vorgenanten Ulreichen von Antheis und seiner hausvrown vrown Kathrin und iren erben disen brief versigelt mit meinem insigel ze ainer stetikait diser sach. Der red ist zeug: her Alber von Mainberch, David von Liligenveld und sin aidem Artolf, Wernhart der richter und ander erber leut genüg, den di sach wol chund ist. Der brief ist geben nach Christes geburd über dreuzehenhundert jare und darnach^a in dem ainsundzwainzigisten jar, an dem weinhacht^b tag.

Source Fulltext: LAMPEL, Urkunden Sanct Pölten (=FRA I, Wien 1981) S. 253-254