Ich^a Rapot von Wildekke vergiche und thün chunt allen den die disen brief lesent oder horent lesen, di nu lebent und hernach kunftich sint, daz ich mit willen und gunst meins prueder herren Otten und ander meiner erben und meins lehen herrn hant pischolf Albrechtes von Pazzawe verkauft han meines rechten lehens, des ich von im gehapt han dacz Poungarten, den zehent paide grosse und klain ze veld und ze dorf, swie so das genant ist; denselben zehent han ich Rapot von Wildekke verkauft und geben mit allem dem nucze und recht, als ich in^b lehens gewer her^c pracht han, umb ainlefthalb phunt wienner phenninge, der ich recht und redlichen gewert pin‚ dem erbern manne herrn Cholhohen von Alaren und allen seinen erben,^d ledikleichen und vreileichen^e ze haben und allen iren frumen domit ze schaffen, verkaufen, verseczen und geben swem si wellen an allen irrsale. Und daruber ze ainer pessern sicherhait so secz ich Rapot von Wildekche mich dem vorgenanten herrn Chalhohen von Alaren und allen seinen erben uber den vorgenanten zehent^f ze Paungarten ze rechten geweren und scherme für alle ansprach, als lehens recht ist und des landes recht ze Osterreich, und auch also mit ausgenomner rede: swaz herrn Chalhohen von Alaren und seinen erben mit rechte an^g dem vorgenanten zehent ab get, daz sullen si haben auf mir und auf meinen trewn und auf alle meinem gütt, daz ich han in dem land ze Osterreich, ich sei lebentich^h oder tot. Und gibe in darüber disen prief zu ainem sichtigen urkunde und zu ainem offen gezeuge und zu ainer ewigen vestenunge versigilten mit meinem insigil.¹ Und sint auch des gezeug herr Chunrat von Arnstayn‚ⁱ her Johan der schench von Riede, herr Ulrich von Poungarten, herr Chunrat von Alaren, Wolfger der Stalberger und ander frume leut genuch, den diese sache wol chunt ist. Diser brif ist geben ze Wienne, do von Kristes geburt warn ergangen^j dreuzehenhundert jarr in dem zwai und zwainzigistem jare darnach, an dem Perch tage.

Source Fulltext: LAMPEL, Urkunden Sanct Pölten (=FRA I, Wien 1981) S. 254-255