Ich Cholman von dem Chotweige und min hausvrowe vro Clar und ich Peter sin prueder und min hausvrowe vro Gedrawt und ich Perenhart Cholmans geswei wir verjehen und tün kunt allen den die disen prief lesent oder hornt lesen, die nu lebent und hernach kunftich sint, das wir mit unser erben gueten willen und gunst und mit verdachtem muet und mit gesampter hant, zu der zeit do wir es wol getün mochten, und mit unsers perchmaisters hant Tyemen von Svefringe verkauft haben unsern weingarten, der da leit dacz Suefringe an dem dorfe und haisset dew Peunt; denselben weingarten haben wir reht und redelichen verchouft und gegeben mit allem dem nucze und reht als wir in her bracht haben in perchrechtes gewer, umb hundert phunt wiennaer phenninge, der wir recht und redelichen gewert sin, dem beschaiden manne dem Paulen an dem Salczgriezze ze Wienne und siner hausvrowen vron Christein und allen iren erben, furbas allen iren frumen damit ze schaffen, verkaufen, verseczen und geben swem sew wellen an allen irrsal. Und zu ainer pesseren sicherhait so seczen wir uns unverschaidenleichen über den egenanten weingarten, ich^a Cholman und min hausvrowe vro Chlar und ich Peter sin prueder und min hausvrowe vro Gedrawt und ich Perenhart sin geswei, dem vorgenanten Paulen und siner hausvrowen vron Christein und allen iren erben fuer uns und für alle unser erben ze rechten geweren und scherme fuer alle ansprache, als perchrechts recht ist und des landes recht in Osterreich. Und darüber so gib ich obgenanter Peter inn disen brief zu ainem sichtigen Urkunde und zu ainem waren gezeuge und zu ainer ewigen vestenunge diser sache versigelten mit minem insigel. Und wand wir, ich vorgenanter Cholman und ich Pernhart sin geswei, niht insigel haben, so verpinden wir uns mit unsern trewen an aides stat mit sampt Petrein under sinen insigel mit samt im alles das ze laisten und ze volfueren daz hie vor an disem prief geschriben stet. Dieser brief ist geben ze Wienne nach Christes gepurde dreuzehenhundert jar darnach in dem zwaiundzwainzigistem jar‚ an sand Blasen tag.

Source Fulltext: LAMPEL, Urkunden Sanct Pölten (=FRA I, Wien 1981) S. 256