Ich Pernhart herrn Pernharts sun von Melkch und ich Gotschalich Fridreichs sun des Harlanter von Staederstorf und alle unser erben wir verjehen und tuen chunt allen den^a di den brif sechent oder hörnt lesen, die nu lebent und hernach chunftig sint, daz wir ze lechen gehabt haben mit einander und ungetailt einen zechent dacz Altmanstorf und ze Harlant von dem edln hoch geboren fürstenpischof Gotfriden ze Passaw und von dem^b goczhaus daselben, einen zehent ze² . . . . . . . . . . . . . . . . . . . . . . . . . . . . . . . . . Denselben zehent haben wir ze chaufen geben mit verdachtem mütt und mit güten willen, zu der zeit do wir iz wol getuen mochten, Friderichen Friderichs sun von Altmanstorf und allen seinen erben umb ainz min dreizzich phunt phenning wienner münz, derwir recht und redleich gewert sein. Wir haben inn auch den zehent auf geben mit des egenanten unsers lehcha herrn hant, des edlen fürsten pischof Gotfrides ze Pazzaw, der inn denselben zehent verlihen hatt ze rechtem lehen mit allen nucz und recht, als wir inn gehabt haben, versuecht und unversuecht, wie das genant ist, daz si allen irr^c frum damit schaffen schulln mit verchaufen, mit verseczen und geben wem si wellen mit unsern gueten willen an allen irresal. Wir wellen auch desselben zehents irr scherme und ir gwer sein für alle ansprach, als lehens recht ist in dem land ze Österreich. Nement sew darüber dehainen schaden mit recht an dem egenanten zehent, den schul wir inn ablegen, und sullen daz haben auf allem dem guet das wir haben in Osterreich, wir sein lebentig oder tod. Wenn auch si des schadens nicht lenger geraten wellent‚ so süll wir inn den ab legen. Weschaech des alles nicht, so sol inn unser herre der herzog in Österreich oder wen er darzu schaft unsers guts, wa wir das haben in Osterreich, als vil inn antbürten davon si werden gewert ir schadens, den si genomen haben und den si uns mit irr trewn gesagen megen mit unserm gueten willen an alle chlag und an alles fürbot. Das inn di red also staet und unzebrochen beleib, darüber so geben ich Pernhart herren Pernharts sun von Melkch und ich Gotschalich Friderichs sun des Harlanter von Staederstorf disen brief versigelten mit unsern baiden insigln³ zu ainem waren urchund und staeten sicherhait diser sache. Wir haben auch gebeten di erberen herrn herrn Otten von Wald und herrn Stephans^d von Hohnberkch, das di baid ir insigel an den prief gehangen habent zu einem gezeug diser wandlung. Der prief ist geben dacz Sand Pölten, nach Christes geburt uber dreuzehenhundert jar darnach in dem vier und vierzikistem jar, des phinztags in der phingstwochen.

Source Fulltext: LAMPEL, Urkunden Sanct Pölten (=FRA I, Wien 1981) S. 362-363