Ich Margreth des^a Hainr. Muestiner witib und ich Peter und Jans und Ulreich, Phillipp, Dietreich und Katrey und Dietmar wir vergehen all offenbar an disen brieve allen den di in sehent, lesent oder hornt,* die nu lebent und hernach chunftig sind, das wir mit verdachtem müt und mit gesampter hant und mit will* aller unser erben, zu der zeit do wir es wol getün mochten ze chaufen haben geben unsers rechten aigens funzehen phening geltz^b Hainrich dem Mendlein von Chigling, die er uns gedient hat von einem achker, leit in der aw, und zwai vassang huener, also beschaidenlich furbas nicht mer uns noch chainem unsern erben ze dienen, allen sein frumen damit ze schaffen an allen chrieg. Nu hat der egenant Heinrich im und sein erben ein ewigs selgeret auf den* achker gemacht^c unserer frawn ewichlich ze dienen hinz Chaczenperg ze rechtem purkrecht alle jar an unser frawn tag zu der liechtmeß ain^d vierdung wags zu einer wandlung cherzen.¹ Es hat auch der egenant Hainrich mer gechauft sechs phening gelts die auf einem akcher ligent, der leit in Pendezziner^e veld, den Ulreich Gerungs sun chauft hat von Petrein dem Muestiner und ist auch irs aigens. Dewselb aigenschaft hat Hainrich gechauft und hat die sechs phening gelts abgenommen, also beschaidenlich das man furbas ewichlichen sol allew jar dienn von dem selben akcher Ulreich^f oder sein erben oder wer in innehat ein vierdung wags zu derselben wandlung cherzen^g hinz der egenanten unser frawn zu dem egenanten selgeret. Es sol auch der egenanten gult stifter und stewrer sein ewichlich wer pharer ist zu Chappell. Diser sach sind zeugen: Dietmar der Muestinger, Gerung von Nydern Muesting, Ulrich auf'm^h perg von Persnich und ander piderleut genueg, den die sach wol chunt ist. Das die wandlungⁱ und der chauf furbas stet^j und unzebrochen beleib, dar uber gib ich egenante Margreth mit sambt meinn egenanten chindern disen brief versigilten mit meins sun insigil Petreins² und mit hern Hainreich insigil von Prukke die zeit^k pharr ze Chappell der Chorherren ainer zu^l Sand Polten. Und ist das geschehen do man zalt von^m Christi geburde dreuzehenhundert jar darnach in dem siben und vierzigisten jar, des suntag ze mitter vasten.

Source Fulltext: LAMPEL, Urkunden Sanct Pölten (=FRA I, Wien 1981) S. 388-389