Ich Kunrat der Stainberger und ich Gedrawt sein hausfraw und alle unser erben verjehen und tün kunt allen den die disen brief lesent oder hornt lesen, daz wir mit wolbedachtem muet und nach unser pesten frewnt rat und mit aller unser erben guetleichen willen und gunst und mit gesamter hant, z'der zeit do wir es wol getuen machten, verchauft und geben haben dem erberen manne Wulfing dem Veirtager und seinr hausfrawn frawn Chünczen und ir baider erben unsers rechten purkrechts ain mulhof mit unser frawn hant der ebtisinn ze Erlach, der man alle jar davon dient ainhal phunt wienner phenning fur ain swein und sechs schilling wienner phenning auf sand Michels tag ze purkrecht, und hat si nicht mer rechts darauf; und ist der hof gelegen ze Wentendorf pei der Pielach. Den vorgnanten mulhof haben wir inn verkauft und geben ze allen den rechten als wir in in rechtes purkrechts gwer enher pracht haben mit alle dew und darzu gehört ze veld und ze dorf, versucht und unversucht, swie iz genant sei, um hundert phunt wienner phenning an zwai phunt phenning, der wir recht und redleich gewert sein, also beschaidnleich das si furbas mit dem vorgenanten mulhof und swas dar zu gehort allen iren früm sullen schaffen mit verseczen und verkaufen und geben wem si wellen an allen irsal, und sullen des ir recht scherm und gwer sein für alle ansprach, als purkrechts recht ist und des landes recht ze Osterreich. Nehmen si darüber schaden mit recht, den selben schaden sullen wir in genzleich ablegen an alle widerred, und sullen si daz haben auf uns und auf allem unserm güt daz wir haben in dem land ze Osterreich, wir sein lebentig oder tod. Das die red also stet beleib und unzebrochen, darüber ze ain sichtigen urkund und ze ain waren gezeug gib ich^a vorgenanter Chunrat der Stainberger und ich Gedrawt sein hausfraw und alle unser erben dem erbern manne Wulfing dem Veirtager und frawn Chunczen seiner hausfrawn und ir baider erben disen brief versigelt mit mein vorgenants Chunrats des Stainberger anhangunden insigel.¹ Der sache sind auch gezeug: Ortolf der Stainberger mein prüder, Wolfganch der Stainberger mein veter und Kunrat der Pielacher mit iren anhangunden insiglen. Der brief ist geben nach Kristes purt drewzehenhundert jar darnach in dem acht und vierzigistem jar, an sand Philips und sand Jacobs tag.

Source Fulltext: LAMPEL, Urkunden Sanct Pölten (=FRA I, Wien 1981) S. 404-405