Ich Dietreich vom Reisech und ich Gedraut sein hausvrowe und unser erbm wier verjechen oeffenleich mit dem brief alln leuten, acz wier noch unser pesten freunt rat und gunst, zu der zeit do wier icz wol tuen mochten, geschaft und gebm habm zu aienem ewigen jartag unsers rechten chauf aiegens ain phunt wienner phenning gelts, dacz^a leit ze Loech pei Eysgesperch auf aiem lehen, dor aufsiczt Haienreich und U^elreich, also dacz^a ich vorgnanter Dietreich vom Reisech und mein nochst erbm ewichleich begen schullen dacz Sand Christoffen des nachsten tags noch aller sel tag noch meim toed von dem vorgnanten phunt gelts, der schol man des ersten gebm fumf und zwainzich umb fumf weke und achzehen umb aienn schof pauch und echt und zwainzich umb wein und mit dreizziken schol man mess^b frum und den zwain geselln docz Sand Christoffen zehen phenning umb zwo mess des selbm tags; und di herren schullen vigilii sprechen ob meinem grab an aller sel ebent; und mein nochst erbm schullen des phunt gelts fogt sein und schullen do von zwai faschanch huenr habm ze fogt recht; und wer zechmaister docz Sand Christoffen ist, der schol des vorgnanten phunt gelts stifter und stoeerer sein noch meim toed, und sechs phenning von dem halbm lehen an und ab, und der zechmaister schol zwai heribst huenr habm und schol dacz^a almuesen helfen ze tailn. So beleibmt dennoch an drei ain halbp, di schol man umb fleisch und umb prat gebm, und schullen dacz^a di holden gen chirichen helfen ze pringen und do helfen ze tailn; und di selbm holden di auf dem selbm lehen sizzent schullen anders nichtz punten sein denn ieren rechten dienst. Und wann ich vorgnanter Dietreich vom Reisech und mein erbm nicht aiegenr insigil habm, do von gebm wier den brief versigilt unter des erbern mans insigil Niclos des Sebechen und unter Haienreichs des jungen Purchfelder² insigil, dacz seu des ewigen jartags und des geschefts zeug sind mit iern zwain aiegen insigiln. Der brief ist gebm noch Christes gepu^erd dreuzehen hundert jar dornach in dem echt und vierzkisten jar, for sand Thomans tag des nachsten mentags

Source Fulltext: LAMPEL, Urkunden Sanct Pölten (=FRA I, Wien 1981) S. 412-413