Ich Ott von Planchenstain und ich Alphait sein hausfraw und ich Ulreich sein sun und ich Offenmei sein hausvrow wir verjehen und tun chunt allen den di disen brief lesent oder hörnt lesen, di nu lebent und hernach chunftig sint, das wir mit unser erben guetleichem willen und gunst und mit verdachtem muet und mit gesampter hant, zu der zeit do wir iz wol getuen machten, verchauft haben unsers rechten aigens zwelif^a schilling gelts und zwelif phenning gelts auf ain hof in den Reisech², do Hainreich auf^b gesessen ist in dem Aigespach, in Hofstetter pharr mit alle dem nucz und rechten als wir iz in alter herr haben pracht, versuecht und unversuecht, umb süben und zwainzig phunt wienner phenning, di wir gelegt haben an das halb haus dacz Pielach das wir gechauft haben von Wulfing dem Haüsler und von sein erben, der wir gar und genzleich gewert sein, den erbern geistleichen herren probst Dietmaren, heren Wernharten zu den zeiten techent doselbs, herren Otten von Hagenaw chorherr und chamerr und doselbs dem capitel gemain desselben goczhaus dacs Sannd Pölten und alle iren nachchomner^c furbas ledichleich und freileich ze haben und alle iren frumen domit schaffen und geben swem sew wellent an allen irrsall. Und sein auch wir und unser erben des vorgenanten guets irr recht scherme und gewer fuer alle ansprach als aigens recht ist und des landes ze Osterreich. Wer aber das si an dem egenanten guet icht schaden nemen, von swelichen sachen das wer mit recht, das sulle wir inn alles ausrichten und widercheren an all irre mue und an alle iren schaden. Und sullen auch se das haben auf uns und auf alle unserm guet, das wier haben in dem lande ze Osterreich, wir sein lebentig oder tod. Und das diser chauf furbas stet und unzebrochen beleib, geb wir ich Ott von Planchenstain und ich Vlreich von Planchenstain in disen brief ze einem waren sichtigen urchund und zu ainer ewigen vestigung diser sach versiglt und bestät mit unseren insigelen. Der sach sind auch gezeug: Hainreich und Wulfinch di Hewsler mit iren insigln. Der brief ist geben do van Christes gepurd ergangen waren dreuzehenhundert jar darnach in dem acht und vierzgistem jar, an sand Thomas tag vor weinnachten.

Source Fulltext: LAMPEL, Urkunden Sanct Pölten (=FRA I, Wien 1981) S. 413-414