Ich Chunrat Chunrats sun des schreiber, purger dacz Sand Pölten vergich und tun chunt offenlich an dem brief alle den di in an sechent oder horent lesen, das ich mit verdachtem mütt und mit^a gunst meiner frewnt und mit herrn Perichtolcz des Tuschleins willen chorheren dacz Sand Polten, der mich vorgenanten Chunraten mich und mein hab ze den zeiten inn hat gehabt, ze kaufen han gegeben Wulfingen dem Veirtager und seine erben ain zehent der do gelegen ist ze Wentendorf und ze Pawngarten mit alle dem recht und nuczen di dor zu gehoerent, versucht oder unversuecht, umb suben phunt phenning wienner munze, der ich gar und ganz gewert pin. Und sol ich vorgenanter Chunrat des vargnanten zehentz, der lehen ist von mein herren pischolf von Passaw, ir scherme und gewer sein für alle ansprach mit recht, als gewonhait ist in dem land ze Osterreich, und sullen das haben auf alle der hab di ich^b han in dem land ze Österreich, ich sei lemtig oder tod. Das in di red also stet und unzebrochen beleib, so han ich gepetten den erbern man Seifriden pei dem tör ze den zeiten richter dacz Sand Polten, der der sach und der wandlung zeug ist mit seinem anhangentem insigel, und ist auch zeug Kunrat der Newslinger mit seinem anhangentem insigl, wan ich selber aigens insigels nicht enhan, und ist zeug Chunrat der Eisner und ander erber leut den di sach auch wol kunt ist. Der brief ist geben nach Kristes purd uber dreuzehenhundert jar und dornoch in dem neun und vierzigistem jar, an sand Aeten tag.

Source Fulltext: LAMPEL, Urkunden Sanct Pölten (=FRA I, Wien 1981) S. 414-415