Albertus dei gracia dux Austrie, Styrie et Karinthie universis hanc litteram inspecturis salutem in domino. Honorabilis vir Dietmarus ecclesie sancti Ypoliti apud Sanctum Ypolitum ordinis sancti Augustini canonicorum regularium prepositus, noster cappellanus dilectus, ad nostram accedens presenciam a nobis cum devocione humili postulavit, ut privilegium incliti principis patris nostri dive recordacionis domini Alberti dei gracia Romanorum regis semper augusti super libertatibus bonorum et possessionum suarum confectum approbare et innovare dignaremur, cuius quidem privilegii tenor talis est:¹||
Nos itaque peticionibus ipsius . . honorabilis prepositi de liberalitate nostra inclinati, prenotatum privilegium ratum habentes pariter et acceptum de verbo ad verbum presentibus insertum approbandum duximus et innovandum. Verum ubi in dicto privilegio exprimitur clausula ista »cum personis et possessionibus et rebus omnibus attinentibus monasterio supradicto«, id de personis possessionibus et rebus ipsius monasterii tam infra muros oppidi Sancti Ypoliti quam extra et circumquaque de bonis eiusdem monasterii intelligi debere volumus et hoc interpretacione nostra clara declaramus sincerius ampliantes. In cuius innovacionis testimonium presentes conscribi et maioris sigilli nostri munimine iussimus roborari. Datum Wienne, quarto die Marcii, anno domini millesimo trecentesimo quadragesimo nono.

Source Fulltext: LAMPEL, Urkunden Sanct Pölten (=FRA I, Wien 1981) S. 415-416