Ich Albrant von Ramsenpach und ich Agnes sein hausfraw und all unser erben wir verjehen offenleich an dem brief und tuen chunt allen den die in sechent oder hörent lesen, di nu lebent oder hernach chunftig werdent, das wir verchauft haben unsers rechten aigens fuenf und subenzich phenning gelts die wir gehabt haben auf dem guet an dem Prant gelegen in der Edlicz in Pischolfstetter pharr, mit allen den rechten und nüczen als wir iz in rechter aigens gewer herpracht haben, dem erbern ritter herrn Wulfingen dem Veirtager und all sein erben umb funf phunt phenning wienner münezz‚ der wir ganz und gar verricht und gewert sein. Sewsullen auch mit den vorgenanten funf und sübenzich phenning gelts allen iren frum schaffen mit verseczen und mit verchaufen und geben wem si wellent an allen irsal. Wir sein auch der vorgenanten funf und subenzich phenning gelts irr rechter scherm und gewer für all ansprach, als aigens recht ist und gewanheit in dem land ze Österreich. Wer awer das in daran icht abgieng mit recht an den vorgenanten funf und subenzich phenning gelts, was si des schaden nehmen, den ir ains pei seinen trewn gesprechen mag ungesworen, denselben schaden sull wir in ganz und gar abtragen und widercheren, und süllen sew das haben auf uns und auf alle dem gütt das wir haben in dem land ze Österreich, wier sein lemptig oder tod. Daz die red stet und unzebrochen beleib, dorüber so gib ich vorgenanter Albrant von Ramsempach disen brief versigelt mit meinem anhangunden insigl. ¹ Der sach ist auch gezeug Hainreich der Leonperger mit seinem anhangundem insigel. Der brief ist geben noch Christes^a dreuzehenhundert jarr darnach in dem neun und funfzigistem jar, an sand Matheus tag.

Source Fulltext: LAMPEL, Urkunden Sanct Pölten (=FRA I, Wien 1981) S. 497-498