Ich Seyfrid der Sicherpekch, ich Elein sein hausvrowe und all unser eriben tuen chunt offenlich mit disem brief allen den di in an sehent oder hoernt lesen, di nu lebent und hernach chunftig sind, das wier mit gesampter hant, mit guetleichem willen, ze der zeit do wier es mit recht wol getuen mochten, recht und redleich verchouft haben ain halb phunt wienner phenning geltes gelegen auf ainem hof am Guetenekk in Pranter pharr, do ze den Zeiten Dietreich, Rueger und Seyfrid auf gesezzen sind, und das unser pu^erchrecht gewesen ist von dem gotzhaus ze Sand Poelten, und davon wier auch dem selben gotzhaus jerleich achthalben wiennaer phenning ze puerkchrecht gedient haben; dasselb halb phunt wiennaer phenning gelts auf dem egenanten hof an dem Guetenekk¹ haben wier verchouft und geben umb sibenthalb phunt wiennaer phening, der wier genzlich verricht und gewert sein, dem erwierdigen und geistleichen herrn hern U^elreichen dem Veirtager probst ze Sand Poelten und dem convent gemainlich da selbs fuerbas ledichlich und freileich ze haben und allen iern frumen damit ze schaffen, als in das aller pest wol choem und fueg, an allen chrieg und ierrsal; und sein auch des mit sampt unsern eriben unverschaidenlich ier recht gewer und scherm fuer alle ansprach. Get in fuerbas dar an icht ab mit recht oder ob si mit recht icht chrieg oder ansprach dar an gewunnen, von wem das wer, das schullen wier in alles ausrichten und widercheren an all ier mue und an allen iern schaden; und schullen si das haben auf uns und auf alle dem guet das wier haben in dem land ze O^esterreich oder wo wier daz haben, wier sein lebentig oder tode. Mit u^erchund des briefs versigelt mit mein obgenanten Seyfrits des Sicherpekchen insigel² und mit meiner sweger insigeln Puerchhart von Ried und Dietreichs des Charphaimer und mit meins vettern insigel Marichharts von Metters,³ di wier des vleizzichlich gepeten haben, das si der sach zeugen sind mit ieren insigeln. Der brief ist geben nach Christes gepu^erd dreuzehen hundert jar darnach in dem vier und sechzigistem jar, an sand Kathrein tag.

Source Fulltext: LAMPEL, Urkunden Sanct Pölten (=FRA I, Wien 1981) S. 602-603