Ich Chadolt von Zinzendorf, ich Ann sein hausfrawe und all unser erben vergehen und tuen chunt offenlich mit disem brief, daz wier mit wolbedachtem muet, mit guetlichem willen, ze der zeit da wier es mit recht wol getuen machten, recht und redlich verchauft haben die sechs schilling wiennaer phenning geltes gelegen ze Antzenperg in der pharr ze Hertzogenbu^orch auf unserm halben hof² den wier gen unserm vettern hern Otten von Zinzendorf gehabt haben. Denselben unsern halben hof mit alle die und dar zue gehoert ze veld und ze dorf, gestift und ungestift, versuecht und unversuecht, wie das alles genant ist oder woe das gelegen ist, mit allen den ern nützen und rechten als wier das in aigens gewer voer aller erbvoegtei ledichlich innegehabt und her pracht haben, haben wier verchauft und geben umb zwelf phund wiennaer phenning, der wier genzlich verricht und gewert sein, dem erwierdigen³ geistlichen herren hern Vlreichen dem Veyrtagêr probst des gotshaus datz sand Polten⁴ und dem convent gemainlich daselbs und allen iern nachkomen, also daz sew das selb guet und gult an alle erbvogtei als ier ledigs und vreis aigen fuerwas innhaben suellen und allen iern frumen damit schaffen, ver chaufen versetzen und geben wem seue wellen an allen chrieg und iersal. Auch sein wier des ier recht gewer und scherm fuer alle ansprach als aigens recht ist und des landes recht in Oesterreich. Gêt in fuerwas dar an icht ab mit recht oder ob seue mit recht icht chriegs oder ansprach dar an gewunnen, von wem das wêr, das süllen wier in alles ausrichten ablegen und widerchern und süllen seu das haben auf uns und auf alle dem guet daz wier haben in dem lande ze Österreich oder woe wier das haben, wier sein lebentig oder toed. Mit urchund des briefs versiglt mit mein obgenanten Chadoltz insigel von Zinzendorf und mit meiner vettern insigellen hern Otten von Zinzendorf und Gregoergen von Zinzendorf, die diser sach zeugen sind mit iern insigellen. Geben dacz sand Pölten, nach Christes gepürd dreuzehen hundert jar darnach in dem sechs und sechzgistem jar, an sand Giligen tag.

Source Fulltext: LAMPEL, Urkunden Sanct Pölten (=FRA I, Wien 1981) S. 668-669