Den hochgepornen fürsten meinen lieben genedigen herrn herzog Albrechten und herzog Lewpolten herzogen ze Osterreich, ze Steir, ze Kernden, ze Krain, grafen ze Tirol enbeut ich Marchart der Tafsler^a vleizziglich^b meinen getrewn dinst. Genedig herren; ich las ew wizzen umb meinen hof dacz Aczleinstorf auf dem Tulner velde und was darzu gehört, daz ich von ewern gnaden ze lehen han, das ich den verkauft han dem erwirdigen herren herren Vlreichen dem Veiertager probst des goczhaus dacz Sand Polten und dem convent daselbs, den selben hof mit seiner zu gehorung sent ich ew auf an dem brief. Mit urkund des briefs versigelt mit meinem ange druckten insigel. Der brief ist geben dacz Sand Polten, de suntags Reminiscere, anno domini milesimo trecentesimo sexagesimo septimo.

Source Fulltext: LAMPEL, Urkunden Sanct Pölten (=FRA I, Wien 1981) S. 674-675