Ich Janns von Stadekk und mein erben vergehen offenlich mit dem brief, daz uns der erwirdig herr herr Vlreich probst dacz Sannd Pölten und sein convent versaczt habent umb vier hundert phunt wiennaer phenning їr zehent gelegen dacz Gotesprunn dacz Schruczendorf und dacz Newinchel, nur grossen zehent, traid zehent und weinzehent, und nicht chlainen zehent, wan der zu der pharr genn Prukk an der Leytach gehoret, und verpinden uns mit unsern treun, daz wir inn den zehent wider ze lösen geben sullen umb vier hundert phunt wienner phenning, in welhem jarr si das tuen wellen, nur zwischen sand Merteins tag und unser vrawn tag z'der liechtmesse und ze dhainer zeit mer; und wen si des dew gelösent, so sullen wir fürbas damit nichtes mer haben ze schaffen vil noch wenich. Tetten wir des nicht, allen den schaden den si des nemen, wie die genant werden, di irr ainer bei seinen trewn gesagen mag, dieselben scheden sullen wir in allen genzlich ablegen und wider cheren, und sullen si das haben auf uns und auf allem dem gutt das wir haben in dem lande ze Osterreich, wir sein lebentig oder tod. Und wann ich noch² nicht aigens insigls enhan, darumb so gib ich den brief versiglten mit meiner sundern vrewnt insigln meins lieben öhaims des edln und ersamen hern Fridreichs von Waltsee z'den zeiten lantmarschalich in Osterreich und mit meins lieben öhaims herrn Wolfgangs von Winden z'den zeiten meins gnedigen herrn herzog Albrechts in Osterreich etc. hofmaister und mit Gorgen des Derren insigln, di ich des fleizzichlich gepeten hann, daz si der sach zeugen sint mit iren insiglen, darunder wir uns verpinden mit unsern trewn alles das genzlich stet ze haben das vor geschriben stet. Geben ze Wienn, an sand Thomas tag, nach Christes gepurde dreuzehenhundert jar darnach in dem siben und sechzikistem jare.

Source Fulltext: LAMPEL, Urkunden Sanct Pölten (=FRA I, Wien 1981) S. 718