Ich Alber der Stukchs von Trautmanstorf und mein erben vergehen und tuen chunt offenlich mit dem brief umb di neunzehen phunt drei schilling und fumfzehen wienner phenning geltes gelegen auf behausten guetern und auf überlend datz Rekleinstorf, datz Weig ling, datz Michelnrust und anderswoe, di wier dem erbern herren hern Ulreichen probst datz sand Poelten und seinem convent daselbs verchauft haben, nach sag des chaufbriefs den si von uns darumb habent, daz wier uns gen in verpunden haben und verhaizzen mit dem brief, ob das wêr daz in icht fuerwas chrieg und ansprach dar umb auf erstunden, von wem das wêr und in welihen wegen das wêr, daz wier darumb an aller stat fuer seu sten suellen und in di schirmen. Wêr aber daz seu des fuerwas icht schaden nêmen mit nachraisen oder mit potschaft, das sullen wier in auch genzlich widerchern. Auch haben wier in sunderlich gegeben in den chauf der obgenanten guetern unser aigenschaft und manschaft der gueter di Hêrtel von Rekleinstorf von uns ze lehen gehapt hat in und ierm gotzhaus fuerwas ewichlich ze haben. Mit urchund des briefs versiglt mit meinem insigel und mit meins suns insigel Jansen des Stûkchsen; des ist auch zeug her Jans der Ryedmarher mit seinem insigel. Geben ze Wienn, an sand Thomanstag, nach Christes gepu^erd dreuzehen hundert jar darnach in dem siben und sechzgistem jar.

Source Fulltext: LAMPEL, Urkunden Sanct Pölten (=FRA I, Wien 1981) S. 717