Ich Go^etfrid der Hollnstainer, ich Michel von Jewching, ich Lewtoldernst, ich Herman der Sinne, ich Go^erig der Leikgeb, ich Albrecht der Hollnstainer, ich Herwort der Schanthekchel, ich Niclas in des Rechs hof, ich Jans der Ratolt und all unser eriben, vergehen und tu^en chunt offenlich mit dem bri^ef allen den di in sehent ho^ernt oder lesent, di nu lebent und hernach chu^emftig sind, das uns di erwi^erdigen geistleichen herren her U^olreich der Vei^ertager probst des gotzhaus datz sand Po^elten und der convent gemainleich da selbs recht und redleichen hin lazzen haben i^er weingerten * datz Jewching in der Wochawe: von erst den Newnperchk an dem Cholmu^ents, darnach den weingarten genant di Angerpeunt² *** der unser igleichem sein tail mit i^er gu^etem willen und rat ausgemerkcht und gezaigt ist. Di selben i^er weingerten habent si uns und unsern eriben ewichlich lazzen, so beschaidenlich daz wi^er di vorgenanten weingerten mit unser selbs gu^et paun schullen und in gu^etem rechtem pau di halten schullen mit aller der arwait di weingerten rechtlich angeho^ert und des si bedu^erfen, und schullen wi^er fu^er di selben unser arbait und pau all jar zu der zeit und man di list nemmen halben tail alles des weins der dar inne wi^ert, den wi^er vor den weingerten maisch weise geleich und ungeverlich mit in tailn schullen und wellen, und mu^egen auch dann unsern tail fu^ern wo wi^er hin wellen, ausgenomen das wir in besunderlich den zechent von dem selben wein jerlich richten schullen³ und schullen auch uns jerlich raihen und geben an Sand Merteins tag ain phunt wienner phening ze hilf und ze stewr des paus, der gevallen und angelegt werden schullen mit i^er oder i^ers hofmaisters wizzen datz Jewching, an mist oder an stekchen, wie daz aller nu^etzleichist ist, sechzikg phenning in daz Ho^e hel, sechzigk phenning in des Rauphleichs stellen, sechzigk phenning in Symons stellen und sechzigk phenning in den Entzenstorffer; und was daz lesen chostet daz schullen si geleich halbs gelten und raihen. Si habent auch uns und unsern erben di vorgenanten weingerten lazzen, das wi^er mit den vorgeschriben rechten unser igleicher mit seinem tail allen seinen frumen schaffen schullen und mu^egen mit verchoufen, wie uns das wol cho^em. also: welicher seinen tail verchoufen well, daz di selben di verchoufent erbern gesezzen leuten, di die vorgenanten i^er weingerten wol gepaun und verwesen mu^egen in allen den rechten als vor gechriben stet; und schol der selbig chouf geschehen mit i^er oder mit i^ers hofmaister datz Jewching handen wizzen und willen; und wer der ist der seine recht verchouft, der schol in oder i^erm hofmaister in i^ern hof datz Jewching geben ze ablait zwen phening, und der di in nimt* zwen phenning und nicht mer. Si schullen auch di obgenanten weingerten mit aller stewr und mit allem dienst selb verrichten und das an unsern schaden davon raihen. Auch schullen si oder i^er verweser und hofmaister ze Jewching, wer der ie ze den zeiten ist, di vorgenanten weingerten jerleich beschowen ze zwain têgen, an sand Go^erigen tag und an sand Jacobs tag, und schullen auch nemmen zu der selben beschawung erber umbsetzen zwen o er menigern, di zu weingerten arbait sich* verwizzen; und welicher tail weingerten dann nicht in guetem pau funden wu^erden, der selben tail schullen si sich danne ze stet underwinden und schullen in genzleich darumb vervallen und von uns ledig sein, also daz wi^er fu^erbas weder umb dieselben unser tail weingarten, noch umb den wein der desselben jares dar inne wechst, noch umb daz pau und arbait di wi^er dar in gelegt hieten, dhainen zu^espruch haben noch gewinnen schullen, vil noch wenikch. Wann wi^er selber aigner insigel nicht haben, so geben wi^er den bri^ef zu ainem ewigen offen u^erchund und stetigung versigelten mit herrn Fridreichs des Po^etinger insigel zu den zeiten pu^erkgrafen ze Tiernstain und richter in der Wochawe, mit Nyclasen des Juden insigel und mit Jacobs insigel in der Wochawe ze Jewching, di wi^er des vleizzichleich darumb gepeten haben, daz si der sache zeugen sind mit i^ern insigeln, und verpinden auch uns und all unser eriben mit unsern trewn under di gegenwu^ertigen insigel alles das genzlich stet ze halten und ze volfu^ern das vorgeschriben stet. Geben datz Sandpo^elten, an dem heiligen ostertag, nach Christi gepu^erd dreuzehn hundert jar darn.ach in dem a^echt und sechzigistem jar.

Source Fulltext: LAMPEL, Urkunden Sanct Pölten (=FRA II, Wien 1901) S. 19-20