Ich Dyetreich der Reikendorfer und ich Martha sein hausfraw und all unser erben wi^er vergehen offenbar mit dem brieve und tun chund allen den die in ansehent oder horent lesen, das wir mit wolbedachtem muet mit gunst und willen aller unser erben mit gesampter hant, nach unser pesten und nagsten frewnt rat, die zeit do wir es mit recht wolgetun mochten, recht und redlich verchauft und ze chaufen geben haben unsers rechten und freien aigen achtzehen schilling wienner phenning gelts die man alle jar dient von einem weinzurl gericht das gelegen ist ze Wenigenrust, do die zeit Ekherd auf gesessen ist, den vorgenanten dienst den dient man jerlich, newn schilling phening an sand Polten tag und newn schilling ze weinachten, mit alle die und dar zu gehorent ze veld und ze dorf, versucht und unversucht, wie so das genant ist und wo es gelegen ist, mit alle den eren rechten und nutzen und davon chomen mag, als wir es alles und^a unser vordern in rechter aigens gewer herpracht haben, also haben wir es ledichlich ze chaufen geben der erbern junkfrawen Annen Lenpergerinn umb sechsundreissig phund wienner phening, der wir ganz und gar verricht und gewert sein an allen schaden. Si sol auch furbas und ir erben mit dem vorgenanten gut allen iren frum damit schaffen, verchaufen versetzen und geben wem si wellent an allen irsall. Wir sein auch des vorgenanten guetz alles und was darzu gehort ir recht scherm und gewer fur all ansprach als aigens recht ist in dem land ze Osterich. Wa^er aber das si^b icht ansprach oder chriegs daran gewunnen, was in daran abgieng mit recht, von wem das war, das sullen wir in alles ablegen und widercheren an alle ir mu^ee und an allen iren schaden und sullen si das haben unverschaidenlich auf uns und auf alle dem gu^et das wir haben in dem lande ze Osterich, wir sein lebentig oder tod. Das der chauf und die wandlung alle also stet und unzeprochen beleib, daruber gib ich vorgenanter Dietreich der Reikendorfer in den brieve versigilt mit meinem insigill; des ist zeug Ruger der Zichk und Nicla der Obchuter mit iren aigen insigil. Geben an sand Philipps tag nach Christi gepurde dreuzehenhundert jar dar nach in dem acht und sechzigistem jar.

Source Fulltext: LAMPEL, Urkunden Sanct Pölten (=FRA II, Wien 1901) S. 25-26