Wir Ulreich von gots gnaden brobst des goczhaus dacz Sand Pölten und wir der convent gemaincleich daselbs vergehen und tun kund offenleich mit dem brief, das wir recht und redleich verkauft haben unsers rechten aigns unser mul gelegen an dem Griess dacz Sand Polten und was darzu gehort dem erbern mann Dyetreichen dem Pekchen dacz Sand Polten, Kristein seiner hausfrawn und irn erben umb X lb. wienner phening, der wir gar und genzleich verricht und gewert sein, so beschaidenlich das si dieselben mul und was darzu gehort ze purkrecht von uns haben sullen, und sullen uns davon dienen alle jar I lb wienner halb an sand Jorgen tag und halb an sand Michels tag zu rechtem purkrecht. Auch sullen si mit derselben mul allen irn frumen schaffen mit verkaufen versetzen und geben wem si wellen, in den rechten als an dem brief geschriben stet. Auch sol der selb Dietreich sein hausfraw Kristein ir erben oder wer die obgenant ir mul nach in besiczt uns mit der selben mul wartund sein, also wan das geschiecht das wir in unser phister mul in der stat² bei unserm goczhaus nicht gemallen mugen von gepressten des wassers, wan das darauf nicht gieng, oder von gefruer wegen oder von welherlai andern gepressten das wër‚ das si uns dann mallen sullen allen unsern getraid alsvil wir des bedarfen, und sullen wir in von igleichen mutt dann geben ain phrunt weins und ain herren prot und nicht mer, darzu sullen si uns mit derselben mul wartund sein in allen rechten als uns andrew guter wartend die zu unserm goczhaus gehornt. Das der kauf und die sach furbas also gënzleich stët³ und unczebrochen beleib, daruber geben wir in den brief besigelten mit unsern grassen anhangunden insiglen. Der sach und des kaufs sind zeugen her Berichtold der Tuchel zu den zeiten guster, her Leupolt pharrer dacz Sand Polten, her Hans kamrër dacz Sand Polten, Frannkch der Swadorffer unser diener, und Hainreich unser ammann. Der brief ist geben dacz Sand Polten, nach Kristi gepurd dreuzehen hundert jar darnach in dem newn und sibenzigisten⁴ jar, an dem heiligen weinachttag.

Source Fulltext: LAMPEL, Urkunden Sanct Pölten (=FRA II, Wien 1901) S. 47-48