Wir Ulreich von gots genaden probst des gotshaus dacz Sand Polten und wi^er der convent gemainleich daselbs verjechen und tu^en chunt offenleich mit dem brief umb unser maut zöll ampte gruntrecht purchrecht und ander unser gu^eter dïnst und recht, di wir in der stat datz Sand Polten gehabt haben, di von alter ain marckcht gewesen ist, der uns und unserm gotshaus weilent gegeben ist von dem durchleuchtigesten fürsten chunich Haynreichen von Rôm¹‚ di wir unserm lieben genedigen herren hern Albrechten bischof ze Pazzawe und sein nachchomen dürch niderlegung ettleicher grozzer chrieg und stözz di zwischen uns und unsern vordren manickvaltichlichen davon gewesen sind, ausgewechselt und gegeben haben umb andreu ire und irs pischtums gu^eter und zehent, als di wechselbrief sagent die wi^er gen einander dar umb gegeben haben, daz wi^er uns dar zu^e durch sundrer lieb und getrewen willen gen in verlu^ebt und verpunden haben, und verhaizzen auch mit dem brief, ob daz ist daz er oder sein nachchomen ainer uns, unserm gotshaus und unsern^a nachchomen in den funfzehen^b jaren di nagst nacheinander choment und sich an dem heutigen tag anhebent, di chirchen ze Hu^erben mit aller i^er zugehorung rechtleich und beleibleich geit, ainet, aigent und zufuget mit vollem und ganzem rechten mit seinem und seines ersamen cappitels ze Ppazzawe brief und insiglen und uns mit pabstleichen briefen und wullen^c bestetigung daruber inantwürt und geit, das alles an unser zerung mue und scheden geschechen schol, und uns darnach an berübt und leibleich gewêr rechtleich seczzt und furbaz dar auf schirmet, also daz wi^er die selben chirchen mit unsrer chorherren ainem oder mit lainpriestern, wie ez uns füg, beseczen verwesen und besingen mogen, daz sich der dan underzichen mag und genemen ze seinem pistum di gu^eter und zehent all di uns an dem obgenanten wechsel gegeben sind, als der wechsel^d brief sagt, ausgenomen dez Haghofes und dez Chrannestes mül bei der stat dacz Sand Polten, die bei unserm gotshaus beleiben sulln; und den selben Haghof und mul sulln wi^er dann einem bischof ze Pazzawe und seinem gotshaus mit guten gestiften gütren widerlegen und gutmachen, also daz di als vil bringen an gewissem gelt als der vorgenant hof und mül an gever. Wer awer daz sich di vorgenanten funfzehen jar vergiengen,^e daz die chirchen ze Hurben in den selben jaren in unser gewalt nicht pracht wurd in der maz als vor geschriben ist, so sulle wi^er der obgenanten gelub ledig sein und sol der gegenwürtig brief furbaz tod und ze nichteu sein. Mit^f urchünd dez briefs besigelt mit unsern grozzen zwain anhangunden insiglen. Geben dacz Sand Polten, nach Christi gepürd dreuzehen hundert jar darnach in dem neun und sechzgisten jar, an sand Stephans tag in den weinacht veirtagen.

Source Fulltext: LAMPEL, Urkunden Sanct Pölten (=FRA II, Wien 1901) S. 49-50