Ich Jans der Syrnikcher, ich Elspet sein hausvrowe und all unser eriben vergehen und tu^en chunt offenlich mit dem bri^ef, das wi^er den erbern und geistleichen herren hern U^elreichen propst des gotzhaus datz Sand Po^elten, seinem convent und allen seinen nachko^emen da selbs recht und redlich zu ainem widerwechsel gegeben haben und geben auch in mit dem bri^ef unser vischwaid gelegen datz Ragenfest auf der Pielach, dawider si uns gegeben habent auz i^erm u^erbar sechs schilling wienner phenning geltes, di gelegen sind datz Feylndorf auf dreizzikch jeucharten akchers u^eberlendes, so beschaidenlich das sew di vorgenanten vischwaid ze Ragenfest mit aller i^err zu^egeho^erung fu^erbas nu^etzen und niezzen schullen und allen îr und i^ers gotzhaus frumen da mit schaffen verchoufen versetzen und geben wem si wellen an allen chrieg und i^errsal. Und sein wi^er des i^er recht gewern und scherm fu^er all ansprach, alz aigens und des landes recht ist in O^esterreich; get in fu^erbas dar an icht ab mit recht, daz schu^ellen wi^er in ausrichten ablegen und widercheren und schullen sew das haben datz uns und auf all dem gu^et, daz wi^er haben in dem lande ze O^esterreich, wi^er sein lebentig oder tod. Wi^er schullen auch di obgenanten sechs schilling wienner phenning geltes datz Feylndorf von in ze lehen haben, ich und mein leiberben. Mit u^erchund des briefs versigilten mit meinem insigel, mit Fridreichs meins prueder insigel und mit Otten des Po^emer insigel, di der sache zeug sind durch unsrer vleizzigen pet willen. Geben nach Christi gepu^erd dreuzehen hundert jar darnach in dem newn und sechzigistem jar, an sand Gilgen tag.

Source Fulltext: LAMPEL, Urkunden Sanct Pölten (=FRA II, Wien 1901) S. 70