Ich Dietreich der Reykerstorffêr, ich Martha sein hau^esvrowe und all mein erben vergehen und tu^en chu^ent offenlich mit dem brief allen den di in sehent hornt oder lesent, die nu lebent und hernach chu^enftig sind, daz wir mit wölbedachtem mu^et und mit gütlichem willen, zder zeit da wi^er ez mit recht wol getün machten, recht und redlich verchau^eft haben unsers rechten ledigen vrein aigens sechs schilling minner ainen pfenning geltes, als wienner mu^enzze, di^e gelegen sind datz Obern Ru^est auf ainem lehen, da Symon Mârt auf gesezzen ist und daselbs au^ef u^eberlend au^ef ainer hofstat gelegen in Obrechtsperger pharr; di vorgenanten gu^elt und gu^eter mit all die und dar zu^e geho^ert, ze veld und ze dorf, gestift und ungestift, versu^echt und unversüecht, wie daz genant ist und wa daz gelegen ist, mit allen eren nu^etzen und rechten, als wi^er daz unversprochenlich an all eribvogtei innegehabt und herpracht haben, haben wi^er verchau^eft und geben umb neun phu^ent wienner phenning der wir gar und gënzlich verri^echt und gewert sein dem erbern chnecht Jansen zden zeiten des erwirdigen geistlichen herren hern U^elreichs probst datz Sand Po^elten chamrêr und seinen erben fu^erwas ledichlich und vreilich ze haben und allen i^ern fru^emen damit schaffen, verchaufen versetzen und geben wem si wellent, an allen irsal; und sein wi^er des i^er recht gewern und scherm fu^er all ansprach, als aigens und des landes recht ist in Österreich. Get in fu^erwas daran icht ab mit recht, oder ob si mit recht icht chrieg oder ansprach dar an gewu^ennen von wem daz wâr, daz su^ellen wi^er in gënzlich ablegen und widerchern an allen irn schaden, und su^ellen sew daz haben datz uns und au^ef all dem gu^et, daz wi^er haben in dem lande ze O^esterreich oder wo wi^er daz haben oder noch gewinnen‚ wi^er sein lebentig oder tod. Des ze u^erchund gib ich obgenanter Dietreich der Reykerstorffer dem obgenanten Jansen und seinen erben den brief besigilten mit meinem insigil.² Der sach sind zeugen Rûger der Zikch³ und Nicla der Akchotêr mit irn insigilen, di wi^er darumb vleizzichlich gepeten haben, daz si der sach zeugen sind mit irn insigilen. Geben datz Sand Po^elten, nach Christi gepu^erd dreuzehen hundert jar darnach in dem na^ewn und sechzgistem jar, an sand Cholmans tag.

Source Fulltext: LAMPEL, Urkunden Sanct Pölten (=FRA II, Wien 1901) S. 71-72