Ich Wo^elf, ich Dietreich und ich Wernhart prueder von Hautzenfeld und all unser eriben vergehen und tu^en chunt offenlich mit dem brief umb di ansprach di wi^er gehabt haben hinz ainem vi^ertail hofs ze Steten und hinz alle die so dar zu^e geho^ert und auch hinz dem vi^ertail zehentes der in denselben hof weilent gefu^ert ist, wie der genant ist und auch wo der gelegen ist, darumb wi^er chrieg und ansprach gehabt haben hinz dem erwi^erdigen geistleichen herren hern Johannsen probst datz Sand Po^elten und hinz seinem convent da selbs, das wi^er derselben unserr chrieg und ansprach ze paiderseit gegangen sein hinder di erbern herren hern Stephan von Toppel von Wazzerberkch hern Weicharten von Toppel und hern Maricharten von Ti^ernstain, also was di nach i^ern trewn mit dem rechten erchanten und sprëchen, da scholten und wellen auch wi^er fu^erbas pei beleiben. Nu habent si nach gu^etem rat erberr leut ritter und chnechten, di si dar zu^e genomen habent, mit dem rechten erchant erfunden und gesprochen, das wi^er an dem egenanten vi^ertail hofs ze Steten noch an alle die so dar zu^e geho^ert und auch an dem egenanten zechent dehainerlai recht haben schullen noch gemo^egen in dehainem weg, vil noch wenikch, danne das uns der vorgenant her Johanns probst datz Sand Po^elten von der vorgenanten herren hern Stephans, hern Weykchartes von Toppel, hern Marichartes von||
Ti^ernstain und auch unserr vleizziger pet willen von gnaden das vorgenant vi^ertail hofs ze Steten und auch was dar zu^e geho^ert wider verlihen hat, wann wi^er vormals dasselb vi^ertail mit seiner zu^egeho^erung dem gotzhaus datz Sand Po^elten auf gegeben haben fu^er grozze gelt schu^eld der wi^er schuldig warden, so beschaidenlich daz wi^er dasselb vi^ertail stiftleich ze veld legen schullen und das fu^erbas mit allem dienst und vordrung als ander i^erew gu^eter verrichten schullen, ausgenomen ains ganzen jares das wi^er dasselb vi^ertail an allen di^enst haben schullen, das sich nu an dem nachsten sand Jakobs tag anheben schol; dar zu^e schullen wi^er in von dem selben unserm vi^ertail gepunden sein alles zehentes ze geleicher weis als man in des zehentes von den andern drin vi^ertailn gepunden ist. Darumb so luben und verhaizzen wi^er mit unsern trewn an geverde daz wi^er noch unser eriben noch niemand ander von unsern wegen hinz dem egenanten zehent dehainerlai ansprach haben schullen in dehainem weg vil noch wenich, denne daz wi^er in getrewlich darinne hilfleich und fu^ederleich sein wellen. Wann aber das ist das der vorgenant her Johanns probst datz Sand Po^elten, sein convent und i^er nachko^emen oder wen seu dar zu^e schaffent das egenant vi^ertail von uns choufen wolten, so schullen wi^er in des choufes stat tuen, wann sew des an uns mu^etent unverzogenlich nach rat zwai^er erberr manne, der igleicher tail ainen nemmen schol. Wer aber daz wi^er daz indert u^eber fuern in dehainem weg und des nicht stët hielten, so schullen wi^er an dem egenanten vi^ertail und was dar zu^e geho^ert und auch an aller vordrung alle unsrew recht verlorn haben; dar zu^e schullen wi^er den obgenanten herrn unsern spruchleuten dreizzig phunt wienna^er phenning vervallen sein. Des ze u^erchund geben wi^er, ich obgenanter Wolf, ich Dietreich und ich Wernhart pru^eder von Hautzenfeld den brief versigelten mit der obgenanten dreier herren hern Stephans, hern Weikchartes von Topel² und hern Marichartes von Ty^ernstain anhangunden insigeln, di wi^er des vleizzichleich gepeten haben, daz sew der sache zeugen sind mit i^ern insigeln; wann wi^er selb aigner insigel nicht enheten, so verpind wi^er uns mit unsern trewn fu^er uns und fu^er all unser eriben under di gegenwu^ertigen insigel alles das genzlich stet ze haben daz vorgeschriben stet. Geben nach Christi gepu^erde dreuzehen hundert jar darnach in dem sibenzigistem jar, an mitichen nach sand Margareten tag der heiligen junchfrowen.

Source Fulltext: LAMPEL, Urkunden Sanct Pölten (=FRA II, Wien 1901) S. 86-87