Ich Träwsel von Träwtmanstorf zden zeiten richter ze Holnbu^erkch vergich und tün chunt offenlich mit dem brief, daz ich den erwi^erdigen meinen herren hern Johannsen probst datz Sand Pölten und seinen convent daselbs mit gutem willen und unbedwungenlich recht und redlich aufgegeben han daz haüs dacz Fridawe auf der Pyelach in Grafendorffer pharr und alles daz daz darzü gehört, wie daz genant ist und wo daz gelegen ist, und waz ich innegehabt han bei meins herren zeiten hern Ulreichs sa^eligen des Veyrtager weilent probst des obgenenten gotshaus datz Sand Pölten und auch sider seines todes ven desselben meines herrn wegen unz her auf di zeit, und aussen auch mich desselben hauzz dacz Fridaw und seiner zugeho^erung und waz ich innehabt han mit dem brief, also daz ich no[ch mein]² erben fürwas [dheiner-]lai [an sprach noch vod-]rung darnach haben [sullen noch gew-]innen [in dhainen weg vil noch wenich], wand ich rechtlich erchenne, daz ich an dem vorgenenten hauzz [dacz Fridaw und] an aller seiner zugehörung [noch a]n die so ich innegehabt han, dhainerlai recht gehabt han noch geha[ben mag; es] we^are danne, daz mir der vorgenant mein herr her Johanns probst datz sand Pölten und sein convent, der daz vorg[enant] haus datz Fridaw und alles das daz dar zu gehört oder was ich inngehabt han, rechtlich ist, nach sag irr brief mit rechtns von sundern gnaden daran an geben oder geben wolten. Darumbe so lub und verhaizz ich mit meinen triwn daz ich und mein erben alles das ge^anzlich stät haben wellen und schüllen, daz vorgeschriben stet. Mit urchund des briefs versigilt mit meinem insigil, mit des erbern herren insigil hern Marchart ven Tyrnstein und mit meiner guten vrewnt insigiln Chunrats des Veyrtager und Pernolts des Chlingenfurter, di ich dez vlizzig gepeten han, daz si der sach zeugen sind mit irn insigiln. Geben nach Christi gepu^erd drewzehen hundert jar darnach in den sibenzkisten jar, des vreytags^a nach den heiligen auffertag.

Source Fulltext: LAMPEL, Urkunden Sanct Pölten Nachtrag (=FRA II, Wien 1901) S. 427-428