Ich Liebhartt vonn Pühl und all mein erben vergehen und tün chunt offnlich mit dem brief, das uns di erwirdigen geistlichen herrn herr Johanns brobst Niclas techant und der convent dacz Sannd Polten recht und redlich gegeben habent ainen weingarten in purkchrechts weise gelegen in dem Stainetal, der weilent in ir chamer dacz Sannd Pölten gehört hatt, also beschaidnlich das wir inn jerlich von dem selben weingarten in di egenant irr chamer dacz Sannd Pölten an des heiligen chreuts tag als es gehöcht ward virzig phenning ze purkrecht dienen sullen und sullen auch mit demselben weingarten allen unsern frum schaffen verchaufen verseczen und geben wem wir wellen in den vorgeschriben rechten an allen chrieg und irsal, und sind des unser recht geweren und scherem fur all ansprach, als purkchrechts und des landes recht ist in Osterrich. Wer auch das wir inn di egenanten phirzig phenning auf den egenanten tag nicht geben, so sol inn der vorgenant weingart mit sampt dem wein der darinne wirt vervallen sein und sich des mit unserm gütlichem willen underziehen an all widerred. Mit urchund des briefs versigilt mit herrn Fridreichs des Piber z'den zeiten purgraf ze Tirnstain und Otten des Wolfenräwter z'den zeiten purgraf ze Chrembs baiden anhangunden insiglen, di wir des vleizzichleich gebeten haben, das si der sach zeugen sind mit iren insiglen, in an schaden; wand wir selb aigner insigil nicht enhaben, darumb verpind wir uns mit unsern trewn under di gegenburtigen insigl, alles das genzlich stet ze haben das vorgeschriben stet. Geben nach Christi gepurd dreuzehenhundert jar darnach in dem sibenzigistem jar an Sannd Niclas tag.

Source Fulltext: LAMPEL, Urkunden Sanct Pölten (=FRA II, Wien 1901) S. 100-101