Ich Chunradt der Veyrtager ich Kathrey sein hausfraw und all unser erben vergehen und tün chunt offenlich mit dem brief das uns dev^a erwirdig und geistlichen herrn hern Johanns brobst dacz Sand Polten und sein convent daselbs verricht und gewert habent hundert phunt wienner phening an den zwainhundert phunden dar wir iren brief haben, und sagen sew der hundert phundt wienner phening genczlich ledig und loz. Mit urchund des briefs besigilt mit mein obgenanten Chunradt des Veyrtager insigil; und der sach ist gezeug Mert der amptman dacz Sand Polten mit seinem insigil, den wir darumb vleizzichlich gepeten haben. Geben nach Kristi gepurde dreuzehenhundert jar darnach in dem sibenzigistem iar, des mitichen vor sand Kathrey tag der heiligen junkfrawn.

Source Fulltext: LAMPEL, Urkunden Sanct Pölten (=FRA II, Wien 1901) S. 100