Ich maister Albrecht pharrer ze Gors, zu den zeiten pu^echartzt der hochgeporn fu^ersten meiner genedigen herren . . der herzogen von O^esterreich, bechenn und tuen chunt offenlich mit disem brief^a allen den di in sehent, lesent oder ho^ernt lesen nu und hienach in chunftigen zeiten, das ich durich meiner sele hailes willen und durich merung willen christenlicher chunst und lere gestiftet und geordnet han, das in dem haus gelegen ze Wyenn in der Kernder strazz zwischen herrn Thomas haus des chorherrn datz sand Stephan ze Wienn und zwischen Wernhartes haus des Fuetrer und gegen hern Jacoben u^eber von Sunnberg drei sublectores und ain student des chlosters und des ordens ze Sand Po^elten ewichleich sein schullen. di selben sublectores in der universitet und gefreieten schu^el ze Wienn stetichlich lesen und leren schullen; und schullen der erwi^erdig her Johans probst, her Niclas techant und der convent gemainlich des egenanten gotzhauses ze Sand Po^elten, sand Augustins ordens in Pazzauer pistum und all i^er nachko^emen ewichlich zu der selben stiftung alle jar den vorgenanten drein sublectoren und dem studenten i^ers ordens raihen und geben vier und zwainzig phunt wienner phenning von allen den guetern und gülten di si und i^er gotzhaus ietzunt haben oder fu^erbas gewinnen, wo di gelegen oder wie si genant sein, und schullen di antwu^erten gen Wienn ze den vier quattempern in dem jar; das wi^ert i^er igleichem in ainer quattember zwelif schilling phenning. Und darumb han ich dem egenanten probst, . . dem techant und i^erm gotzhaus gegeben fumf phunt wienner phenning geltes auf bestiften und behausten guetern; so han ich in auch gegeben dreuhundert phunt und vier phunt wienner an beraitem gelt, di an i^er und i^ers gotzhaus grozz notdu^erft und scheinbern nutz becheret sind; und davon mit willen gunst und bewerung des erwirdigen herren und vatters herrn Albrechtes pischofs ze Pazzowe habent si gelobt fu^er sich und i^er nachko^emen und in^b namen i^ers gotzhauses di obgenanten vi^er und zwaintzig phunt phenning jerlich ze richten den vorgenanten drein sublectoren und dem studenten, als vor geschriben stet an alle widerred verziehen und geverde. Wer aber das si oder i^er nachko^emen di sechs phunt phenning verzugen ze geben ze dehainer chottemmer in dem jare, so schol und mag ich der egenant maister Albrecht di weil ich leb oder nach meinem tode ein probst ze Sand Stephan ze Wienn und ein obrister schu^elmaister da selbs, welich di ie ze den zeiten sind, di sechs phunt³ oder was denn versezzen wi^ert, nemen und auz gewinnen ze christen oder zu juden auf i^ern und i^ers gotzhaus schaden, den selber schaden auch si und îr gotzhaus mit sampt dem gelt das si denn versezzen hetten, richten und weren schullen an alle widerred und geverde. Tëten si des aber nicht und das auch verzugen oder des wider sein wolten, so schullent di egenanten herren von O^esterrich oder îr lantmarschalich si dar zu^e halten und no^etten, wenn si darumb gevordert werden von mier oder ob ich nicht wêr von dem probst ze Sand Stephan und von dem schu^elmaister ze Wienn. Greschech aber das di schu^el ze Wienn und di universitet in der mazze ab nêm, das chain sublector da wër, so schullen si den egenanten zins ze ieder quattember da ze Wienn niderlegen und dasselb gelt der obgenanten stift und ordenung ze nu^etz cheren und anlegen nach i^er oder i^err nachko^emen und ains probstes und ains schu^elmaisters ze sand Stephan ze Wienn, wer di denn sind, rat und verainung, und schol auch ich vorgenanter maister Albrecht di drei sublectores erwellen antwu^erten und dar geben nach meinem willen, di weil ich leb; aber nach meinem tode schullen ein probst und ein obrister schuelmaister ze sand Stephan ze Wienn zwen sublectores erwellen und geben, di si zu der schu^el nu^etz und gu^et dunchent und di pesten di si denne gehaben mu^egen an gever, und den dritten sublector schullen der probst von Sand Po^elten oder sein nachko^emen erwelen und antwu^erten dem probst und dem schu^elmaister ze Sand Stephan ze Wienn; und di schullen in denne insetzen zu den andern, ob er si nu^etz und gu^et dunchet. Wer aber das er in mizzviel und si dar zu^e unnutz deucht, so mugen si ainen andern an sein stat nemen, der si gu^et und endlich^d dunkch an geverde; und derselb dritt sublector, er sei von in oder von dem probst und dem schu^elmaister ze Wienn erwelet und genomen, schol den studenten i^ers ordens, der in der egenanten stift ist, mit lere innhaben und besorgen fleizzichleich mit trewn an geverde und widerred, als das alles wol beweiset der brief und der egenant probst und der techant ze Sand Po^elten fu^er sich und all i^er nachko^emen ewichleich mit i^ern anhangunden insigeln daru^eber gegeben habent. Und das alle di punte und artikel di da oben begriffen sind bedenthalben also stet gehabt und ewichlich gehalten und volfu^ert werden, so gib ich der obgenant maister Albrecht^e disen brief besigelten mit meinem anhangundem insigel, und dar zu^e mit des erwi^erdigen hern Johannsen iezunt probst ze Sand Stephan ze Wienn anhangundem insigel, der das auch durich meiner fleizzigen pet willen daran gehenket hat ze mererr gezeugnu^ezz aller der vorgeschriben sache. Der bri^ef ist gegeben ze Wienn, an sand Cholmans tag, nach Christ gepu^erde dreuzehen hundert jar darnach in dem sibenzigistem jare.

Source Fulltext: LAMPEL, Urkunden Sanct Pölten (=FRA II, Wien 1901) S. 95-97