Ich Weykchart der Horder und ich Margaret sein hausfrawe und all unser erben vergehen und tün chünt offenlich mit dem brief allen den di in sehent hörnt oder lesent, di nu lebent oder hernach chünftig sind, daz wir mit wolbedachten müet und mit gesampter hant und auch nach rat unserr nachsten und pesten freünte, zu^o der zeit da wïr ez mit recht wol getün machten, recht und redlich verchauft haben unsers rechten ledigen frein aigens unsern hof ze Engleinstorf mit aller seiner zügeho^erung, der gelegen ist in Wilhalmspurger pharre, ausgenomen fümf tagwerch wismades genant an der Praiten wis davon wir jerlich in denselbem hof ze Engleinstorf dreizehenthalben wienner phening an sand Michels tag ze purkchrecht dienen süllen, und dar zü haben wir jerlich an sand Michels tag der erbern frawen von Landenberkch achthalben wienner phennig ze purkchrecht gedint von ainer awe zwischen der Pyelach und dem mulgang gelegen auf dem Chronbidech, di auch in denselben hof gehört; den vorgenanten hof ze Engleinstorf mit alle die und dar zu gehort, es sei paw wismad paungerten waid holz phenniggult in urbar oder auf uberlende, wie daz genant oder wo daz gelegen ist ze veld und ze dorf, es sei gestift oder ungestift, versücht oder unversücht, mit allen den ern nüczen und rechten, als wir daz allez unversprochenlich in aigens oder pürchrechts gewer innegehabt und herpracht haben unz auf den heutigen tag an all erbvogtei, haben wïr verchauft und geben umb fümf und fünfzig phunt wienner phennig, der wir genzlichen verricht und gewert sein, den erwirdigen geistlichen herren hern Leutolden probst und dem convent gemaindlichen dez goczhauses dacz sand Pölten und allen iren nachkömen daselbens fürbaz ledichlich und freilich ze haben und allen ïrn und ïres goczhauses frumen damit ze schaffen, verchaufen verseczen und geben wem si wellen an allen chrieg und irsal. Und sein wir dez ir recht gewern und scherm für all ansprach als aigens oder purchrechtes recht ist und dez landes recht in Österreich; get in aber fürbaz daran icht ab mit recht oder ob si mit recht icht chrieg oder ansprach daran gewünnen von wem daz wêr, daz sullen wir in gënzlichen ausrichten und widerchern und süllen si daz haben dacz uns und auf all dem güt, es sei erbgut oder varundgut, wie daz genant oder wo daz gelegen ist, daz wir haben oder noch gewünnen in dem lande ze Österrich oder wo wir daz haben, wir sein lebentig oder tod. Dez ze urchund gib ich obgenanter Weykchart der Horder den egenanten chorherren und dem goczhaüs dacz sand Pölten den brief besigilten mit meinem insigl für mich und für all mein erben. Der säch sind gezeugen Stephan der Hordër mein prüder, Janns der Gu^enerspekch, Ulreich der Pyelacher, Dietreich der Zikch und Ott der Faüchter² mit iren insiglen, di wir dez vlizziglich gepeten haben; wann ich obgenante fraw Margaret selb aigens insigls nicht enhab, darumb verpind ich mich mit meinen trewen under di gegenwurtigen insigl allez daz genzlich stet ze haben und ze volfürn daz vorgeschriben stet. Geben nach Christi gepürde tausent dreuhundert jar darnach in dem vir und sibenzkistem jare, dez suntags vor sand Dorothea tage.

Source Fulltext: LAMPEL, Urkunden Sanct Pölten (=FRA II, Wien 1901) S. 149-151