Ich Cunradt der Waitz von Schwabdarf, ich Margaretha sein hausfrau, ich Marchart der Schuester von Methers und ich Engel sein hausfraw und all unser erben vergechen offenlich mit dem brief umb ain viertl^a der müll und was zu dem selben viertail gehort, gelegen im Prüll ze nagst der stainen prugkh enhalb der Trasen bei Sant Pölten, das unser rechts erb gewesen ist und das wier mit rechter frag und urtail erlangt und behabt haben mit dem rechten, und ist auch purkhrecht von dem gotshaus ze Sant Pölten, haben wier verkhauft und geben umb zwai phund wienner phenning, der wir gänzlich verricht und gewert sein dem erwirdigen geistlichen herrn herrn Leutolden probst und dem convent ze Sand Pöltn dem selben irem gotshaus und allen iren nachkhomen daselbs fürpaß ledigclich und freilich ze haben und allen iren frum damit schaffen, verkhaufen verseczen und geben swem si wellen an all unser irrung. Und sein auch wier des ir recht gewern und scherm fur all ansprach; geet in aber daran icht ab mit recht, das sollen si haben dacz^b uns und auf all dem guet das wier haben oder noch gewinnen in dem lande ze Osterreich oder wo wier das haben, wier sein lebendig oder tod. Und des zu einem warem urkhund und sicherchait so geben wier inn den brief besigeltn mit des erbern vestn ritter insigl herrn Michels des Vttendarfer und mit des erwern mans sigill Hansen des Fläming, die wier vleissig gepettn haben das si der sach gezeugen sein mit iren insigeln; wan wier selber aigen insigl nicht enhaben, darumb so verpint wier uns mit unsern trewen under irew insigl alles das gänzlich stät ze halten und zu volfiern das oben an dem brief begriffen ist. Geben an sand Veits tag, nach Christi geburd 1379^ten jar.

Source Fulltext: LAMPEL, Urkunden Sanct Pölten (=FRA II, Wien 1901) S. 223-224