Ich Ott von Topel vergich offenlich mit dem brief^a umb alle die chrieg stöss und misshelung die di erbern geistlichen herren her Lewtolt probst und der convent gemain des chlosters ze^b Sand Polten auf einem tail und Walthers von Chaczenperg und Albrecht des Judenawer an dem andern tail gegen^c einander gehabt haben von der weg steig^d änger und auch von^e eins prunns wegen, die zu der obgenanten unser frawn chappellen ze Chaczenperge gehornt und gen sullen, und auch von eines gertleins und eins graben wegen das der egenante Walther von Chaczenperg aufgevangen het und das do stozzt an seinen hof daselbs ze Chaczenperge, und darzu umb all mess die^f daselbs ze Chaczenperg in der chappellen gesprochen sullen werden, und von eins ewigen liechts wegen das prinnen sol in der pharchirhen ze Chappellen^g und darzu umb all schaden und zerung die der vorgenant Albrecht der Judenawer von desselben chriegs wegen genommen sol haben, des die egenanten herren der brobst und der convent zu Sant Polten auf irem tail gegangen sein^h hinder den erbern vesten ritter hern Träwslein zu den zeiten phleger ze Holnburch und die erbern Hannsen Alatherⁱ, Otten den Grabner und Merten von Eystorf, also was die nach iren trewn und gueter chuntschaft der umbseczen doselbs und erber leut rat zwischen den egenanten baiden tailen sprëchen und erfunden, es wär min^j oder recht, das si das ganzlich stët enhab solten. Nu machten die obgenanten^k vier spruchleut mit dem rechten und mit der min nicht uberain komen und habent mich obgenanten Otten von Topel mit * baidertail gunst und willen zu einem obman genommen nach irr puntbriefe sage, die si mir zu baiderseit darumb gegeben habent, also was ich zu dem rechten zwischen in sprich, erchenn und erfind^l und was ich auch sprich, das sullen und wellent si zu baider seit genzlich stët haben an alles geverde. Nu sprich ich: von erst^m das aller unwill, vallⁿ und veintschaft die die obgenanten baid teil^o von der vorgenanten sach wegen gen einander gehabt habent, genzlich ab sullen sein an alles geverde. Darnach sprich ich zu dem rechten nach gueter kuntschaft der pharleut ze Chappellen edler und unedler, das die obgenanten weg steig änger und der prunn und auch das gertl und der graben so vor benant ist‚ hinfur ewichlich frei ligen sullen der obgenanten chapellen ze Chaczenperg und auch allen leuten die zu derselben unser frawn chappellen ze Chaczenperg ze wandelen habent, als das von alter herkomen und gelegen ist. Es sol auch alle tag taglich daselbs ze Chaczenperig ein mess, wer die gestift hat, gesprochen werden und an dem sambstage^p zwo. Es sol auch hinfur ein iglicher pharrer, wer dieselben zeit pharrer daselbs ist‚ ze Chappell auf der Persinch der mess ledig sein, die man alle veirtag gesprochen hat in der oftgenanten pharrchirhen ze Chappellen auf unser frawn altar. Denn alsvil ein pharrer daselbs und ein stifter der vorgenanten mess uberein koment, wo die selbig mess gesprochen süll werden in der pharrchirhen ze Chappellen oder in der chappellen ze Chaczenperg. Denn umb die meß der zwo an dem freitag sein sullen der iczunt nür aine ist ze Chaczenperg, und auch umb das ewig liecht das prinnen sol in der oftgenanten pharrchirhen ze Chapellen, das nicht geschehen ist, sprich ich zu dem rechten: ist das des iemant die obgenanten herrn zu Sand Polten beweisen mag mit urchunden die redlich sind oder mit guetern die si gezaigen mügen mit gueter chundschaft, die darzu gegeben sind, also das man die messe und das liecht davon volpringen sülle, so sol es hinfur ewichlich volfuert werden; ist aber das si des aines nicht getün mochten, so sullen furbas die vorgenanten herren zu Sandpolten und ein iglicher pharrer ze Chappellen derselben mess und auch des liechtz^q ledig sein. Es sol auch all unser frawntag und an dem chirchtag in der obgenanten chapellen z Chaczenperig got, unser frawn und allen heiligen mit allem gotsdienst^r löblich gedient werden. Denn umb die schäden die der obgenant Albrecht der Judenawer vordert^s und genomen sol^t haben von des egenanten kriegs wegen, dieselben schaden sullen genzlich und gar^u ab sein. Denn umb die zwo erdein^v mawr ze Kaczenperg die der vorgenant Walther machen hat haissen, der aine leit auf dem anger twerichs über, und ein mawer damit er den weg vermacht hat zenagst seinem hof‚ die sullen nider geprochen werden, als pald ich im den spruchbrieve gib³ darnach in sechs tagen unverzogenlich, und sullen auch die obgenanten weg steig anger und auch der prunn das gertel und auch der graben hinfur ewichlich frei und ledig^w ligen der obgenanten unser frawn chappellen ze Chaczenperg und auch^x allen leuten die darzue ze wandeln habent, als das von alter ie und ie herkömen ist. Und darzu sprich ich, welher tail under in wär der das nicht stät hiet das an dem brief geschriben stet der sol aller der pünt und pen vervallen und schuldig sein ze geben, als die puntbrief sagent die si mir zu baider seit daruber geben habent; und der sol auch alle seine recht in den obgeschriben^y sachen genzlich verloren haben. Und des zu einem waren urchunde gib ich vorgenanter Ott von Topell den oftgenanten||
C¹: ||
erbern herren dem brobst und dem convent gemainchlich ze Santpolten||
C²:||
Waltheren von Chaczenperig, Albrechtem dem Judenawer und allen iren erben den brief besigilten mit meinem anhangem insigil. Geben an nachsten freitag vor dem heiligen phingstag, nach Christi geburde drewzehenhundert^z jar und in dem achzigistem jar.

Source Fulltext: LAMPEL, Urkunden Sanct Pölten (=FRA II, Wien 1901) S. 233-235