Wir Albrecht von gotes genaden herzog ze Osterreich ze Steyr ze Kerenden und ze Krain, graf ze Tyrol etc. tun chunt, das wir angesehen haben die groß und nemlich gastung die der erber unser sunder lieber . . der brobst ze Sand Polten taglich leidet, die im und seinem gotshaus verderblich wäre, ob wir si darinne nicht bedachten. Und davon haben wir demselben brobst ze Sand Polten die genad getan und tün auch wissentlich mit disem brieve, wenn das ist das wir mit unserm gesind ausreiten und da ubernacht oder mer nächt und teg sein, oder wenn wir selb da nicht wären und unser räte ausschikten,^a die auch ain nacht oder mer da beliben und in unserm geschaft ritten, was wir oder si da verzerten, das darinne andrew kloster mit in leiden, das si der egenenten kost und zerung desterpas zukommen mügen. Darumb gepieten wir allen unseren klostern den diser brief gezaigt wirt und wellen wenn wir oder unser gesind solich kost auf den egenanten brobst und das goczhaus ze Sand Pölten, treiben das ir danne mit dem vorgenanten brobst mitleidet und des nicht lasset nach gelegenheit der zerung, das er der desterpas zuchommen müge; wann wir das ernstlich also mainen. Geben ze Wienn, am eritag vor gotsleichnamstag, anno domini millesimo CCC^oLXXX secundo.||
d. dux per Jo. de Tyrna.²

Source Fulltext: LAMPEL, Urkunden Sanct Pölten (=FRA II, Wien 1901) S. 248