Ich Stephan von Hochenberkch und ich Fridreich sein pruder wir vergehen und tün chünt allen den die den brief lesent oder hornt lesen, di nu^e lebent und hernach chumftig sint, das wir mit unser erben gu^etem willen und gunst, mit verdachtem mu^et, zü der zeit da wir ez wol getün mochten, verchauft haben ein holzstat ze Wilhamspurkch^a gelegen an dem Holczgriezz daselbs, zu^enest^b Wolfleins des Veldner holzstat an einem teil und zunest Mertleins des Fleischakcher holzstat an dem andern teil, davon man^c der egenanten holzstat alle jar jerlich di^ent uns^d vorgenanten von Hochenberkch vierundzwainzig wienner phenning ze rechtem purkchrecht an sand Michelstag und nicht mer, umb an dreizzig fumfthalb phunt wienner phenning, der wir gar und genzlich verricht und gewert sein, den erbern^e geistlichen herrn hern Fridreichen probst ze Sand Polten und dem ganzen convent gemain daselbs furbas lediclich und freilich ze haben und allen ïren frumen damit ze schaffen, mit verchaufen verseczen und geben wem si wellen vor allem^f chrieg und irrsal. Wir sein auch der vorgenanten holzstat ir rechter gewer und scherm für alle ansprach als purkchrechts recht ist und des landes recht in Osterreich. Wer aber das^g in an der vorgenanten holzstat icht chrieg oder anspruch auferstund mit recht, dieselben chrieg und anspruch sullen wir in genzlich ablegen und widerchern an all ir scheden, und sullen auch das haben auf uns und unsern erben unverschaidenlich und auf allem dem güt das wir haben in dem lande ze Osterreich, wir sein lebentig oder tod. Und das der chauf furbas also stet und unzebrochen beleib, daruber so geben wir dem vorgenanten hern Fridreichen probst^h und dem conventⁱ den brief versigiltn mit unser baider² anhangunden,^j der geben ist nach Christi gepurd dreuzehenhundert jar darnach in zwaiundachzigistem jar, des nesten sampztags vor sand Veyts tag.

Source Fulltext: LAMPEL, Urkunden Sanct Pölten (=FRA II, Wien 1901) S. 249-250